Koetsjoem
Koetsjoem (Russies: Кучум; in die Siberiese Tartaarse dialek uitgespreek as Koetsoem) (? - c. 1601) was die laaste khan van die Siberiese Khanaat (1563–1598).
In 1563 het Koetsjoem sy broer Jadegar verslaan en die troon bestyg. In 1582 is die Siberiese Khanaat deur die Kosak Jermak aangeval. Hy het Isker, Koetsjoem se tuiste, verower. Die khan het na die steppe gevlug en sy gebied aan Jermak afgestaan.
In 1585 het Koetsjoem Jermak skielik in die middel van die nag aangeval en die meeste van sy mense vermoor. Jermak is gewond en het probeer om oor die Wagai-rivier te swem, maar het verdrink. Rusland moes heeltemal uit Siberië onttrek, maar danksy Jermak se verkenning van die riviere het hulle die hele gebied ’n paar jaar later terugverower.
Koetsjoem se naam word in verskeie Tartaarse en Russiese liedere en legendes genoem. Sy afstammelinge het in Moskowië gebly en eindelik die titel Sibirski aangeneem.
Verwysings
wysig- Hierdie artikel is merendeels vertaal vanaf die Engelse Wikipedia-artikel en:Kuchum