Komsomolskaja Prawda
Komsomolskaja Prawda (Russies: Комсомо́льская пра́вда; letterlik "Komsomol-waarheid") is ’n dagkoerant in ponieformaat[1] wat op 13 Maart 1925 gestig is.
In die tyd van die Sowjetunie was die Komsomolskaja Prawda die spreekbuis van die Kommunistiese jeugliga, die Komsomol. Dit was dus gerig op jongmense tussen die ouderdomme van 14 en 28 en het aanvanklik gefokus op wetenskap en avontuur, terwyl dit die waardes van die Kommunistiese Party van die Sowjetunie aan jongmense geleer het.
Ná die verbrokkeling van die Sowjetunie in 1991 het die koerant ’n algemene Russiese dagblad geword. Dit word tans besit deur Media Partner, wat op sy beurt behoort aan die ECN-groep, ’n energiemaatskappy onder Grigori Berezkin, wat noue bande met Gazprom het. Die koerant se sirkulasie was op sy hoogste in 1990, toe byna 22 miljoen eksemplare daagliks verkoop is.[2] Dit is tans die koerant met die hoogste verkoopsyfer in Rusland, met ’n daaglikse omset van 700 000 tot 3,1 miljoen.[1]
Uitgawes wysig
Benewens die Russiese uitgawe, wat uit streekuitgawes bestaan, is daar ander uitgawes in GOS-lande soos Komsomolskaja Prawda w Ukraine (Ukraïne), Komsomolskaja Prawda w Beloroessii (Belarus) en Komsomolskaja Prawda w Moldowe (Moldowa). Daar is ook ’n Europese uitgawe, Komsomolskaja Prawda w Ewrope) vir Russiessprekende toeriste. ’n Baltiese weergawe kan gevind word in Estland, Letland, Litaue en Finland.[3]
Verwysings wysig
- ↑ 1,0 1,1 "Gazprom Snaps Up Best-Selling Tabloid". The Moscow Times. 22 November 2006. Besoek op 22 Oktober 2008.
- ↑ "The Press in Russia". BBC Monitoring (in Engels). BBC News. 16 Mei 2008. Geargiveer vanaf die oorspronklike op 4 November 2019. Besoek op 16 Mei 2008.
- ↑ Komsomolskaya Pravda Baltiya
Eksterne skakels wysig
Wikimedia Commons het meer media in die kategorie Komsomolskaja Prawda.
Hierdie artikel is vertaal uit die Engelse Wikipedia
