Konrad Henlein
Konrad Henlein (gebore op 6 Mei 1898, Maffersdorf bei Reichenberg, Boheme, Oostenryk-Hongarye [nou Liberec, Tsjeggië]; beswyk op 10 Mei 1945) was ‘n politikus van Sudeten-Duitsland wat voorspraak gemaak het vir die Duitse anneksasie van die Tsjeggo-Slowaakse Sudetenland area en wat tydens die Tweede Wêreldoorlog administratiewe poste in Nazi-geokkupeerde Tsjeggo-Slowakye gehou het. Henlein het sy opvoeding by ‘n kommersiële akademie ontvang,‘n bankklerk, en later gimnastiese instrukteur, geword. Hy was vanaf 1923 tot 1933 die hoof van die Duitse gimnastiese beweging (“Deutsche Turnbewegung”) in Tsjeggo-Slowakye, toe hy na vore getree het as leier van die Sudeten-Duitse Tuisfront (“Sudetendeutsche Heimatfront”) wat in 1935 die tweede sterkste party in die Tsjeggiese Kamer geword het. Op 24 April 1938 het Henlein outonomie vir die Sudeten-Duitse areas geëis. Hy het op 1 September besoek afgelê aan Adolf Hitler en twee weke later, toe onluste in die Sudetenland uitgebreek het en krygswet afgekondig is die Tsjeggiese regering met ‘n ultimatum voorsien om die afkondiging te herroep. Die Tsjeggiese regering het die ultimatum geïgnoreer, en gevolglik het Henlein ‘n proklamasie uitgereik wat die afskeiding van die Sudeten-Duitse gebied aan Duitsland geëis het. Die regering het egter sy party vir aktiwiteite wat met hoogverraad verband hou opgeskort, waarna Henlein na Duitsland gevlug het ten einde arrestasie te vermy en om ‘n Sudeten-Duitse Vrykorps {"Sudetendeutsches Freikorps") op die been te bring, wat na onderonsies op die grens gelei het soos wat die Duits-Tsjeggiese krisis sy hoogtepunt bereik het. Op 1 Oktober 1938, na die konferensie te München en die gevolglike sluiting van die München-ooreenkoms waarvolgens die Sudeten-Duitse areas aan Duitsland afgestaan is was Henlein as Duitse rykskommissaris ("Reichskommissar") vir die Sudeten-Duitse gebied aangestel, en later as partyleier vir die Sudetenland-streek ("Gauleiter" en "Reichsstatthalter"). Teen die einde van die oorlog het hy selfmoord gepleeg terwyl hy in die Geallieerdes se aanhouding was.[1]
| Konrad Henlein | |
|---|---|
.jpg) Freikorps leier Henlein, September 1938 | |
| Reichsstatthalter van die Sudetenland | |
| Termyn 1 Mei 1939 – 8 Mei 1945 | |
| Persoonlike gegewens | |
| Gebore | 6 Mei 1898 Maffersdorf, Koninkryk van Boheme, Oostenryk-Hongarye |
| Sterf | 10 Mei 1945 (op 47) Pilsen, Tsjeggo-Slowakye |
| Politieke party | SdP (1933–1938) NSDAP (1939–1945) |
| Professie | Bankklerk |
| Militêre diens | |
| Rang | SS-Obergruppenführer |
Verwysings
wysig- ↑ "Henlein, Konrad." Encyclopædia Britannica. Encyclopædia Britannica Ultimate Reference Suite. Chicago: Encyclopædia Britannica, 2012.