MXit
MXit was 'n kitsboodskap-toepassing wat in Suid-Afrika ontwikkel is en wat hoofsaaklik op GPRS- of 3G-bevoegde selfone gebruik is. MXit het beperkte versoenbaarheid gebied met meer gevorderde kitsboodskappers soos Windows Live Messenger, ICQ, en Google Talk deur van die nie-verwante Jabber-poort gebruik te maak. Die koste aan MXit verbonde sluit in die prys vir internettoegang soos deur die gebruiker se sellulêre diensverskaffer bepaal, asook ander betaaldienste soos kletskamers wat op die program beskikbaar was. MXit se amptelike uitspraak is die Engelse "mix it" (meng dit), alhoewel die naam ook algemeen in Engels uitgespel word.
| MXit | |
| |
| Ontwikkelaar | Mxit (Pty) Ltd. |
|---|---|
| Aanvanklike vrystelling | 2007 |
| Gestaak | 23 Oktober 2015 |
| Bedryfstelsel | Microsoft Windows, Windows Mobile, Mac OS X, Android, iOS, Java ME, Linux, BlackBerry OS |
| Kategorie | Kitsboodskap |
| Lisensie | Vrywaar |
| Webblad | www.mxit.com www.mxitlifestyle.com |
Ongeveer 11 miljoen rekeninge is in MXit se gebruikerdatabasis geregistreer, en daar het daagliks 17 miljoen intekeninge plaasgevind, so ook meer as 250 miljoen boodskapversendings. Alhoewel die program grotendeels in Suid-Afrika en Indonesië gebruik is, was dit daagliks in ongeveer 120 lande gebruik.[1] Naspers het in Januarie 2007 'n 30%-aandeel in die MXit-maatskappy vir 'n onbekende bedrag gekoop.[2]
Die maatskappy het sy sluiting in 'n verklaring aangekondig op 23 Oktober 2015.[3] Al die maatskappy se intellektuele eiendom en tegnologiebates is aan The Reach Trust, 'n onafhanklike openbare weldaadsorganisasie, geskenk. Terwyl die organisatoriese veranderinge nie die mobiele sosiale netwerk beïnvloed het nie, en gebruikers nog steeds toegang tot al sy dienste kon verkry en gebruik, is in September 2016 aangekondig dat die diens op 30 September gesluit word.
Omstredenheid
wysigMXit het aan enigeen toegang tot die verspreiding en ontvangs van pornografie gebied en pedofiele in staat gestel om met minderjariges in die ongesensorde kletskamers te kommunikeer.[4] Op 30 Julie 2006 het M-Net se aktualiteitsprogram Carte Blanche ontbloot hoe 'n jong meisie met 'n pedofiel gekommunikeer het deur haar persoonlike gegewens met hom te deel.[5] Die skeppers van MXit het sedertdien begin om met die Suid-Afrikaanse regstoepassing saam te span om minderjariges se veiligheid op MXit te beskerm.[6]
Menige nuusagentskappe en koerante het artikels gepubliseer oor hoe ouers hul kinders toelaat om MXit te misbruik en hoe eksamenuitslae gevolglik verswak. Ouers sit met hul hande in hul hare omdat hul kinders na bewering nie meer openlik kan kommunikeer nie en hulle hulself glo in hul eie wêreld van internetkletskamers bevind. Dit het daartoe gelei dat al hoe meer ouers hul kinders se selfone konfiskeer.[7]
Op MXit se webwerf het sy veiligheidsmaatreëls versterk en probeer om die verspreiding van pornografie, bekruipery (Engels: stalking), laster en ander vorme van misbruik te bekamp, alhoewel dit fisies byna onmoontlik was om toe te pas.
Verwysings
wysig- ↑ "MXit to flex its muscle". Geargiveer vanaf die oorspronklike op 9 September 2009. Besoek op 18 Julie 2009.
- ↑ "Naspers acquires a 30% share in MXit". Naspers. 26 Januarie 2007. Geargiveer vanaf die oorspronklike op 11 Julie 2007. Besoek op 15 Augustus 2007.
- ↑ "Last throw of the dice for Mxit". News24. Besoek op 24 Oktober 2015.
- ↑ Huisgenoot en YOU. 27 Julie 2006.
- ↑ "MXit Safety Guidelines" (PDF). MXit.co.za. 19 Oktober 2006. Geargiveer vanaf die oorspronklike (PDF) op 1 November 2006. Besoek op 19 Oktober 2006.
- ↑ Rondganger, Lee (19 Oktober 2006). "MXit teams up with police to improve security". The Star (in Engels). Independent Online. Geargiveer vanaf die oorspronklike op 22 Mei 2008. Besoek op 19 Oktober 2006.
- ↑ ""MXit blamed for exam results"". Geargiveer vanaf die oorspronklike op 8 Oktober 2008. Besoek op 18 Julie 2009.
Eksterne skakels
wysig- (en) Amptelike webwerf Geargiveer 12 September 2008 op Wayback Machine