Mandurah
Mandurah is 'n stad in Wes-Australië wat ongeveer 72 km suid van die staat se hoofstad, Perth af geleë is.
Mandurah | |
|---|---|
 | |
 Ligging van Mandurah in Wes-Australië | |
| Koördinate: 32°31′44″S 115°43′23″O / 32.52889°S 115.72306°O | |
| Staat |  Australië |
| Deelstaat |  Wes-Australië |
| Stigting | 1 November 1829 |
| Oppervlak | |
| • Totaal | 106,6 km2 (41,2 vk. myl) |
| Bevolking | |
| • Totaal | 85 814 |
| • Digtheid | 636,1/km2 (1 647,5/vk. myl) |
| Tydsone | UTC+8 (AWST) |
Mandurah is die streekstad in Australië wat die vinnigste groei. Die stad het gegroei van geïsoleerde vakansiegemeenskappe langs die kus van die Peel-Harvey riviermond tot 'n baie gewilde bestemming vir diegene op soek na 'n alternatiewe lewenstyl. Mandurah se verbinding met die sentrale sakegebied van Perth is versterk met die opening van die Mandurah-Perth spoorlyn in Desember 2007. 'n Ondersoek na beskostigbaarheid in 227 stede in 2008 het dié stad as die duurste in Australië gelys.[1]
Die stadskern se strandgebied is die tuiste van 'n verskeidenheid natuurlewe wat dolfyne, pelikane, seeduikers en 'n oorvloed seelewe wat die bloumanna krap, wat sinoniem met die gebied geword het, insluit.
Die stad word jaarliks deur duisende binnelandse- asook buitelandse toeriste besoek. Mandurah is bekend vir sy beskermde waterweë, uitstekende strande en boot en visvangaktiwiteite.
Geografie
wysig
Die waters van die Peel inham en Harvey strandmeer vorm die middelpunt van Mandurah. Die strandmeer is ongeveer twee keer so groot as Sydney hawe. Die stad is in en rondom hierdie varswaterstelsel geleë wat op sy beurt in die Indiese Oseaan uitloop. Die stad en sy voorstede beskik oor 'n baie lang kuslyn waarvan groot dele uit sanderige strande bestaan. Mandurah het ook 'n paar woonbuurte wat rondom mensgemaakte kanaalstelsels gebou is wat vanuit die Peel inham af uitloop.
Die gebied word deur die City of Mandurah plaaslike regering bestuur, alhoewel daar 'n paar woonbuurte ten ooste van Serpentine rivier geleë is wat deur die Shire of Murray bestuur word.
Klimaat
wysig
Mandurah het 'n klimaat soortgelyk aan die van Perth. Dit is 'n mediterreense klimaat met warm somers en koel winters. Tydens die somer (Desember tot Februarie) is die gemiddelde maksimum temperature 27 °C met 'n gemiddelde minimum temperatuur van 19 °C. Dit kan uiters warm word en dae waar die temperatuur 40 °C in die latere somermaande oorskry kom dikwels voor. In die winter (Junie tot Augustus) is die gemiddelde maksimum temperatuur 15 °C met 'n gemiddelde minimum temperatuur van 9 °C. Mandurah se nabyheid aan die oseaan verminder die temperatuurskommelinge ietwat en is die temperatuur net 'n paar kilometer in die binneland in tipies tussen 4 tot 5 grade Celsius warmer. Mandurah se klimaat is kenmerkend vir die hoë voorkoms van tornado's.[2]