Matière de Bretagne

Matière de Bretagne ("die Bretonse literêre stof"), in die Engelse taalgebied ook Matter of Britain of Arthurian romance genoem, is die versamelnaam vir 'n Middeleeuse siklus van verhale met betrekking tot die Keltiese geskiedenis van Brittanje en Bretagne wat tussen die 12de en 14de eeu ontstaan het - in teenstelling met die twee ander hooftemas van Middeleeuse literatuur, die Karolingiese siklus van die Matière de France (10de tot 13de eeu) en romans wat deur die antieke mitologie geïnspireer is, die Matière de Rome (12de eeu).

Sentraal in die Bretonse stof staan die verhale rondom die legendariese koning Artus, naas ander legendes van die Britse Eilande soos Brutus van Brittanje, Coel, Koning Lear en Gogmagog. Die legendes is gedurende die Middeleeue gekodifiseer, onder meer in die Historia regum Britanniae ("Geskiedenis van die konings van Brittanje") wat deur die Walliese geestelike Geoffrey van Monmouth saamgestel is.