Mauritiaanse roepee

Die Mauritiaanse roepee (valutateken: ₨; ISO 4217 kode: MUR) is die plaaslike geldeenheid van Mauritius.

Een roepee – Republiek van Mauritius.

Geskiedenis

Die roepee is in die lewe geroep deur wetgewing in 1876. Die roepee is gekies as gevolg van massiewe invloei van die Indiese roepee tydens volgehoue Indiese immigrasie na Mauritius. Die Mauritiaanse roepee is in 1877 ingestel ter vervanging van die Indiese roepee, pond sterling en die Mauritiaanse dollar, met die Mauritiaanse roepee gelyk aan een Indiese roepee of 'n halwe Mauritiaanse dollar. Die pond was 10¼ roepees werd op daardie tydstip. Die Mauritiaanse geldeenheid was ook in die Seychelle gesirkuleer tot 1914, toe dit vervang is deur die Seychelle roepee teen gelyke waarde.

In 1934 is die Mauritiaanse roepee gekoppel aan die Britse Pond sterling wat die verbintenis met die Indiese roepee vervang het, teen die koers van 1 Roepee = 1 shilling 6 pennies (die koers waarteen die Indiese roepee ook gekoppel was). Hierdie koers, gelykstaande aan 13 ⅓ rupees = £ 1, is tot 1979 volgehou.

Muntstukke

In 1877 is munte vir die 1, 2, 5, 10 en 20 sent bekendgestel, met die laer drie waardes in koper en die hoër twee silwer. Muntproduksie is in 1899 gestaak maar gedurende 1911 hervat. Silwer muntstukke is eers weer in 1934 geproduseer, toe ¼ , ½ en 1 roepee-munte ingevoer is. In 1947 is 'n koper-nikkel 10 sent bekendgestel, met koper-nikkel vervangende alle silwer in 1950.

In 1971 is 'n nuwe stel van die munte en banknote ingestel deur die Koninklike Munt. Dit stel het Koningin Elizabeth II se portret vertoon op die voorkant en 'n verskeidenheid van heraldiese motiewe op die agterkant. Sommige keersy-ontwerpe vir hierdie versameling is ontwerp deur Christopher Ironside, insluitend die 10 roepee, 200 goue roepee en 250 goue roepee (uitgereik in 1988).

In 1987 is 'n nuwe reeks munte ingevoer, wat vir die eerste keer nie die beeld van die monarg gedra het nie (Mauritius het eers 'n republiek geword in 1992), maar dié van Sir Seewoosagur Ramgoolam. Hierdie munte was 'n koper-bedekte staal vir die 1 en 5 sent (die 5 sent is aansienlik verklein), vernikkelde staal 20 sent en ½ roepee en koper-nikkel 1 en 5 roepees. Koper-nikkel 10 roepees is in 1997 bekendgestel. Munte tans in sirkulasie is die 1, 5 en 10 roepees.

In 2007 is 'n bi-metaal 20 roepee-munt uitgereik ter herdenking van die Bank van Mauritius se 40ste bestaansjaar.

Banknote

Die eerste banknote wat deur die regering uitgereik is (in denominasies van 5, 10 en 50 roepees) dateer terug tot 1876. In 1919 word 'n 1 Roepeebanknoot bygevoeg. In 1940 is nooduitreikings gemaak van 25 en 50 sent en 1 roepee. In 1954 is 25 en 1000 roepees bekendgestel.

Die Bank van Mauritius is in September 1967 as die land se sentrale bank gestig, en is sedertdien verantwoordelik vir die uitreiking van die land se banknote en muntstukke. Die bank het sy eerste note in 1967 uitgereik, bestaande uit vier waardes: 5, 10, 25 en 50 roepees, almal ongedateer en met 'n portret van koningin Elizabeth II op die voorkant. Oor die jare is sommige denominasies hersien met nuwe handtekeninge van die Goewerneur en Besturende direkteur, maar andersins bly dit onveranderd.

In 1985 het die Bank van Mauritius 'n heelnuwe stel banknote van 5, 10, 20, 50, 100, 200, 500 en 1000 roepees uitgereik. 'n Deeglike studie van hierdie banknote wys 'n interessante verskeidenheid van substelle wat deur twee gelddrukmaatskappye ("Bradbury Wilkinson" en "Thomas de La Rue") gedruk is. Die note is ook in verskillende tydperke ontwerp, want daar is baie min identies en konsekwent aan die ontwerpfunksies wat op al die denominasies pryk. 'n Wisselende banknootnommeringstelsel, verskillende vorme van sekuriteitsdrade, variasies in die ontwerp en grootte van die Mauritiaanse landswapen, verskillende ultravioletlig-latente druk, teenstrydighede in die grootte-inkremente tussen die waardes en vele verskillende tipes lettersetwerk wat gebruik is, is net 'n paar van die opmerklike verskille. Hierdie uitreiking was tot in 1998 in omloop.

In 1998 het die Bank van Mauritius het 'n nuwe uitgawe van banknote vrygestel bestaande uit 7 waardes, nl. 25, 50, 100, 200, 500, 1000 en 2000 roepees. Hierdie banknote het 'n standaardformaat gehad en is almal gelyktydig uitgereik in November 1998. Al die banknote van hierdie uitreiking is deur "Thomas de la Rue Beperk" in Engeland gedruk. Hierdie banknote is egter uit sirkulasie onttrek in Junie 1999 weens vele geskilpunte.

Die Bank van Mauritius se mees onlangse herontwerp van sy banknote was in Junie 1999; dit is tans steeds in gebruik.

Huidig-sirkulerende banknote

Elke denominasie vertoon die portret van 'n prominente Mauritiaanse persoon aan die linkerkant.

Denominasie	Portret	Uitbeelding
25 roepees	Sir Moilin Jean Ah-Chuen	Rodrigues
50 roepees	Mnr. Joseph Maurice Paturau	Le Caudan
100 roepees	Mnr. Renganaden Seeneevassen	Hofgebou
200 roepees	Sir Abdool Razack Mohamed	Mauritiaanse mark
500 roepees	Mnr. Sookdeo Bissoondoyal	Universiteit van Mauritius
1000 roepees	Sir Charles Gaëtan Duval	Regeringsgebou
2000 roepees	Sir Seewoosagur Ramgoolam	Bul en 'n suikerrietwaentjie

Verwysings

Hierdie artikel is in sy geheel of gedeeltelik vanuit die Engelse Wikipedia vertaal.