Mercedes-AMG
Mercedes-AMG GmbH, algemeen bekend as AMG, is die hoëprestasiemerk wat deur Mercedes-Benz gebruik word. AMG huur onafhanklike ingenieurs en kontrakteer met buitevervaardigers om Mercedes-Benz AMG-voertuie aan te pas. Mercedes-AMG se hoofkwartier is in Affalterbach, Baden-Württemberg, Duitsland.
Geskiedenis wysig
AMG was oorspronklik 'n onafhanklike ingenieursfirma wat gespesialiseer het in prestasieverbeterings vir Mercedes-Benzvoertuie; Daimler-Benz AG het 'n beherende belang verkry in 1999 en die alleeneienaar van AMG geword in 2005. Mercedes-AMG GmbH is nou 'n volfiliaal van Daimler AG.
AMG-modelle het gewoonlik 'n aggressiewer aansig, 'n hoër vlak van prestasie, beter hantering, beter stabiliteit en die meer uitgebreide gebruik van koolstofvesel as hul gewone Mercedes-Benz eweknieë.[1] AMG modelle is gewoonlik die duurste en die hoogste-presterende variant van elke Mercedes-Benzklas.
AMG-variante word gewoonlik geëtiketteer met twee syfers, in teenstelling met gewone Mercedes-Benzvoertuie, wat drie syfers het (bv., C 63, in teenstelling met C 350).[2] Tradisioneel, gee die twee numeriese syfers die enjin se verplasingsgrootte, maar onlangse modelle het afgewyk van hierdie korrelasie.
Die ontwikkeling van die produkreeks wysig
AMG het begin met die ontwerp en toetsing van resiesenjins. Die besigheid is uitgebrei met die bou van verpersoonlikte padmotors gebaseer op standaard Mercedesmotors. AMG het aanvanklik 'n reeks nie-amptelike opgraderings- en bykomstighedepakkette vervaardig, hoofsaaklik vir die Mercedes-Benz R107 en C107 (1971-1989 SL roadster),[3] Mercedes-Benz W116 (1972-1980 S-klas), Mercedes-Benz W123 (1976-1985 E-klas), Mercedes-Benz W124 (1984-1997 E-klas), Mercedes-Benz W126 (1979-1992 S-klas), Mercedes-Benz R129 (1989-2001 SL roadster), en Mercedes-Benz W201 (1982-1993 C-klas) modelle.
Gedurende die vroeë 1980's tot 1990, het AMG 'n verskeidenheid van enjinprestasiepakkette, allooiwiele en stilering produkte aangebied, as 'n geheel onafhanklike maatskappy van Daimler-Benz. In 1990 het AMG 'n samewerkingsooreenkoms onderteken met Daimler-Benz, en AMG opsies en motors is hierna in Mercedes-Benz vertoonlokale aangebied. In 1999 het Daimler AG, toe bekend as DaimlerChrysler AG, die beherende aandeel van AMG gekoop en hulle het deel geword van die amptelike Mercedes-Benz modelreekse.[4]
Die prestasiewiele wat gedurende dieselfde tydperk aangebied is, was 15-duim of 16-duim ATS AMG vyfspeekpadwiele, algemeen na verwys as Pentas. Penta was eintlik 'n Brits-gebaseerde maatskappy wat die hoë aanvraag na die AMG-wiel destyds aangevul het met 'n replika met slegs 'n baie effense stileringsverskil, maar hulle was nie gemaak of onderskryf deur AMG nie. Die ware AMG wiele het dikwels gepaard gegaan met 'n AMG-prestasieveringpakket wat ingesluit het opgegradeerde en verlaagde verings en herklepte skokbrekers.
Nog 'n gewilde kosmetiese opgradering was die AMG -bakstelle. Dit het gewissel van subtiele voorste lugdamme, tot aggressiewe wye bakstelle vir die W126 koepees. Ander opsies het ingesluit Recaro-sitplekke, kleiner deursnee stuurwiele, instrumenttrosse, chroomverwyderopsie (alle blink dele is kleurgekodeer of in satynswart geverf), yskaste, skuifknoppe, hoëtrou-stereostelsels, verpersoonlikte stoffering en verbeterde binnehoutpakkette.
Sedert die vroeë 2000's, het AMG hoofsaaklik gefokus op superaangejaagde V8 en V6 enjins, maar die maatskappy het hierdie tegnologie amptelik vaarwel geroep in 2006 met die bekendstelling van die natuurlik-geaspireerde 6.2 L M156 V8. Op 16 Januarie 2006 het die Mercedes-AMG-voorsitter, Volker Mornhinweg, aan AutoWeek gesê dat die maatskappy eerder turboaanjaging sal benut vir hoër uitset eerder as superaanjaging. In 2011 het AMG die M157 5.5 L biturbo-V8 vrygestel, wat die M156 in sy volgrootte motors soos die S-Klas en CL-Klas verplaas het. In 2012 het Mercedes-AMG se voorsitter, Olla Kallenius, gesê dat Mercedes-AMG nie dieselenjins sal produseer om te kompeteer met BMW se tri-turbodiesels (BMW M-prestasiereeks) nie.[5]
Verwysings wysig
- ↑ "Mercedes-Benz AMG" (in Engels). Geargiveer vanaf die oorspronklike op 12 Januarie 2019. Besoek op 8 Februarie 2014.
- ↑ 2002 Mercedes-Benz C32 AMG Road Test. URL besoek op 6 Oktober 2014.
- ↑ Hall, Jim. "Rhapsody in Red: 500SL AMG" Motor Trend Magazine, October, 1983.
- ↑ "Mercedes-AMG: The AMG Story beginning" (in Engels). Geargiveer vanaf die oorspronklike op 16 Julie 2017. Besoek op 6 Oktober 2014.
- ↑ "AMG's new chief has big plans for 2006 - AutoWeek Magazine" (in Engels). Autoweek.com. 20 Januarie 2006. Geargiveer vanaf die oorspronklike op 25 November 2011. Besoek op 6 Desember 2011.