Mercedes-Benz G-klas

Die Mercedes-Benz G-Klas, soms genoem G-Wagen (afkorting vir Geländewagen, "oorlandvoertuig"), is 'n middel-grootte vierwieldryf luukse SNV wat sedert 1979 vervaardig word deur Magna Steyr (voorheen Steyr-Daimler-Puch) in Graz, Oostenryk en bemark en verkoop word deur Mercedes-Benz. In sekere markte is dit verkoop onder die Puch naam as die Puch G. Die G-wagen word gekenmerk deur sy bonkige stilering en kas-op-raam konstruksie. Dit maak gebruik van drie tenvolle-sluitewenaars, een van die min voertuie om oor so 'n funksie te beskik. Ten spyte van die bekendstelling van 'n plaasvervanger, die eenheidsbak SNV Mercedes-Benz GL-klas in 2006, is die G-Klas nog steeds in produksie en bly een van die langsgeproduseerde Mercedes-Benz'e in Daimler se geskiedenis, met 'n leeftyd van langer as 35 jaar. Slegs die Unimog oortref dit.^[1]

Geskiedenis

Die G-klas is ontwikkel as 'n militêre voertuig na 'n voorstel deur die Shah van Iran (destyds 'n beduidende Mercedes-aandeelhouer) aan Mercedes^[2] en word aangebied as 'n burgerlike weergawe sedert 1979. In hierdie rol word daar soms na verwys as die "Wolf" en LAPV Enok. Die Peugeot P4 is 'n variant van die G-klas, wat onder lisensie vervaardig word, maar met 'n Peugeot-enjin en ander onderdele.

1983 Mercedes-Benz 300GD

Tot 2002 was die voertuig nie by Mercedes-Benz-agente in die Verenigde State van Amerika beskikbaar nie, hoewel dit voorafgegaan is deur grysmarkinvoere waarvan selfs die basiese modelle sessyferpryse in die 1990's gehaal het. Die model het afgeskop in 2002 as die Mercedes-Benz G500 met 'n V8-petrolenjin en haal reeds 'n verkoopsyfer van 3 114 eenhede daardie jaar.^[3]

Die sogenaamde "off-road" voertuie word erg gespot in die VSA, weens hul wydverspreide slegs-teerpad gebruik (asook ander 4x4 SUV's verwant aan die G-Klas), maar dit is inderdaad bedoel vir swak padtoestande wat soms 'n saak van lewe-of-dood beteken. Verder is dit vir menige bestuurders die enigste manier om by die werk uit te kom in gure weer, soos sneeu of oorstroomde paaie.^[4]^[5]^[6]

Beskikbare variante en modelle

In sy ruim meer as dertigjarige bestaan is die buitekant min verander. Die enjins is wel voortdurend vervang met beter weergawes, en die binneruim het oor die jare reeds 'n paar opknappings ondergaan. In 2010 het die "G-Klasse 30th Edition" op die mark verskyn, wel as 'n besonderse jubileummodel.

Die Mercedes-Benz G-klas kan bestel word in verskillende uitlegvariante, naamlik 'n bakkie, ambulans, bussie, 'n kort stasiewa, 'n lang stasiewa, kabriolet, 'n militêre verkenningsvoertuig en 'n verlengde wa met agterdeure. Daar is beide diesel- en petrolmodelle beskikbaar.

Die Mercedes-Benz G-klas behels drie tiperinge oor die jare heen, met die 460 as die eerste G-klas. In 1990 verskyn die luukse weergawe met 'n meer verpersoonlikte binneruim, die "463 Baureihe". Deurdat die 463 feitlik só luuks geword het, het die 461 sy nismark behou as eenvoudige weergawe met weefstofbekleding en 'n eenvoudige binnekant. Hierdie model was nog lánk beskikbaar vir nutsklante soos boere, die brandweer, konstruksie, ens.

Die G-klas word deesdae gekenmerk deur sy klassieke voorkoms, sy seldsame verskyning en sy luukse binneruim, wat nie minderwaardig staan teen Mercedes se topklassedans nie. Die G-klas is één van die mees waardevaste motors wat daar op die oomblik te koop is. Die vraag na die G-klas is baie hoog en sedert die stygende gewildheid van die SUV-segment het verkope sterk gestyg, veral in die Verenigde State.

In 2004 het Mercedes Benz met die G55 Kompressor vorendag gekom, 'n 476 pk sterk G-Klasse, gebou deur die inhuis-sportversteller AMG. Die G-klas word in Graz gebou deur Steyr-Daimler-Puch; 'n industriële verbond wat al reeds 30 jaar die produksie van die G-klas behartig. Die motor word grootliks met die hand gebou.