Mfolozirivier

Die Mfolozirivier (Umfolozi, Imfolozi, Umfeloos, Veloos) is 'n rivier in KwaZulu-Natal.

Mfolozirivier
Stroomgebied	KwaZulu-Natal, Suid-Afrika
Oorsprong	saamvloei van die Swart-Mfolozirivier en die Wit-Mfolozirivier
Monding	via die St. Luciameer, KwaZulu-Natal, Suid-Afrika Indiese Oseaan
Oorsprong-hoogte	46 m
Monding-hoogte	0 m
Stroomgebiedopp.	11 000 km²
Mfolozirivier
Koördinate: 28°23′32″S 32°25′27″O

Rivierloop

Hierdie rivier ontspring by die samevloeiing van die Swart-Mfolozirivier en die Wit-Mfolozirivier, op die suidoosgrens van die Hluhluwe-iMfolozipark, by 28° 20′ 58″ suid en 31° 58′ 46″ oos. Dit is 43 km stroomop van die mond in die Maphelane-natuurreservaat, 'n deel van die iSimangaliso-vleilandpark.

Vrugbare grond

Dit vloei van wes na oos en het 'n opvanggebied van net oor die 11000 km². Op die oewers word met katoen, sisal, beeste en bloekombome geboer. Sedert 1911 word op die vrugbare grond op beide oewers suikerriet geplant. Swak boerderymetodes het tot erge erosie gelei sodat slik in die St. Luciameer aan die kus beland het. 'n Modderbank het in sy mond opgebou en normale getywerking verhoed. Daarom is die rivier se mond in Mei 1951 gesluit en 'n kanaal gegrawe sodat die rivier sedert 1961 by 28° 23′ 7″ suid en 32° 25′ 31″ oos op sy eie in die Indiese Oseaan uitmond. Die nuwe riviermonding is egter slegs enkele meters suid van die St. Luciariviermonding.

Oorstromings

Die Mfolozi is meesal 'n rustige rivier wat deur moerasse met riete en papirus na die see vloei. Oorstromings in 1918 en weer in 1925 het egter tot lewensverlies en groot skade aan landerye en geboue gelei. Met die tropiese storm Domoina en in 1987 was dit weer die geval.

Bibliografie

• Bate,G.C. en A.K. Whitfield en A.T. Forbes: A review of studies on the Mfolozi estuary and associated flood plain, with emphasis on information required by management for future reconnection of the rivier ot the St. Lucia system. wrc.org.za
• portfoliocollection.com
• Standard Encyclopaedia of Southern Africa, deel 9. Kaapstad: Nasou, 1973. ISBN 0-625-00325-X
• Wannenburgh, Alf: The natural wonder of Southern Africa. Kaapstad: Struik, 1984. ISBN 0-86977-088-8