Moddervulkaan in Buzau, Roeminië.

Moddervulkane bestaan uit vulkaanagtige keëls, waaruit water (meestal koud), modder en verskeie gasse opstyg. In die noordoos-Italiaanse provinsie Emilia word verskeie van hierdie vulkane aangetref; die modder kom van 'n oer-seebodem, want gedurende die Tersiêre Periode was hierdie gebied deur die see bedek.

Die modder wat hier die oppervlakte bereik, bevat dus dikwels see-fossiele bestaande uit versteende plante en diertjies en ook sout (die Italianers noem om hierdie rede die moddervulkane salse). Hoewel hulle klein is, kan die moddervulkane baie materiaal na die oppervlak van die aarde bring: tydens 'n uitbarsting in 1835 is meer as 'n miljoen kubieke meter modder uitgespuit.

By Bakoe in Azerbeidjan (voormalige U.S.S.R.) en 'n paar eilande in die Kaspiese See word moddervulkane aangetref waarvan die keëls 300-400 meter bo die omringende landskap uitstyg.

BronnelysWysig

Eksterne skakelsWysig