Mohammed Farouk Asvat

Suid-Afrikaanse skrywer

Mohammed Farouk Asvat is in 1952 gebore. Sy grootouers is in Indië gebore en kom na Suid-Afrika waar hulle as handelaars in 'n klein Wes-Transvaalse dorp kom bly.

Lewe en Werk wysig

Hier word hy groot en gaan dan na Johannesburg vir verdere studie. Aan die Universiteit van die Witwatersrand kwalifiseer hy as 'n dokter. Hy is aktief betrokke in die stryd teen apartheid en word op 8 November 1973 vir vyf jaar verban en beperk tot Johannesburg weens sy stigting en lidmaatskap van die literatuurgroep Black Thoughts. Ten tyde van sy verbanning word hy deur Amnestie Internasionaal erken as 'n gewetensgevangene. Die verbanning word in 1978 opgehef en hy bekwaam homself in dieselfde jaar as 'n geneesheer aan die Universiteit van die Witwatersrand. Hierna sluit hy nie weer by enige politieke organisasie as lid aan nie, aangesien hy deel wil wees van die bevrydingsproses maar genoegsaam verwyderd daarvan om dit te kan analiseer en kritiseer. Sy politieke aktivisme veroorsaak dat hy menige doodsdreigement ontvang in die periode tussen 1971 en 1995, van beide die regse en linkse kant van die politieke spektrum. Vir twee en 'n halwe jaar na sy kwalifikasie as dokter vind hy dit weens sy politieke rekord onmoontlik om 'n betrekking te bekom. Hy werk in oortreding van sy verbod tot 19 Oktober 1977 by die Zanempilo Gemeenskapsentrum opgerig deur Steve Biko, op welke datum hierdie inrigting deur die owerhede gesluit word. Hier en die Black People’s Community Programmes te Zinyoka in die Oos-Kaap. Sedertdien werk hy by die Northdale, Hillbrow en Coronation hospitale en by die Alexandra Health Clinic. Hy het gewerk as 'n konsultant vir 'n dwelmrehabilitasieprogram, vir 'n weeshuis en vir die Rooikruis en het 'n private praktyk in Kensington in Johannesburg.

Die Black Thoughts groep wat hy stig besoek in 1973 verskeie townships saam met die jazz-groep Dashiki, waar hulle optree en die mense bewus maak van die ongeregtighede onder apartheid. Hy stig ook New Dawn Poets, Vision Publications en Writers’ Forum en werk saam met verskeie politieke, gemeenskaps- en kunstegroepe, soos Vakalisa eKapa, Community Awareness Theatre, Black People’s Convention, South African Students Organisation, Black Community Programmes, die National Forum, die Black Students’ Society, die Institute of Black Research en die Alexanda Arts Centre. Die University of Cape Town Health Care Trust ken in 1979 'n beurs aan hom toe om die sosio-ekonomies-politieke situasie onder apartheid na te vors. Tot 1986 weier die owerhede om aan hom 'n paspoort toe te ken. In hierdie jaar ken hulle 'n baie beperkte reisdokument aan hom toe en beperkte paspoorte word hierna aan hom toegeken om sy studiebeurse op te neem. In 1988 word die Education Opportunities Council Scholarship aan hom toegeken vir verdere studie in Engels aan die Vrije Universiteit van Amsterdam en in 1989 word die Fullbright Scholarship aan hom toegeken vir verdere studie aan die Universiteit van Kalifornië te Berkley in die Verenigde State van Amerika. Benewens sy werk as dokter werk hy ook as 'n vryskutjoernalis en 'n literêre kritikus. Sy openbare optredes is beperk, maar hy tree tog op by die Botsotso Spoken Word Festival in die Markteater in Johannesburg in November 2007, waar hy van sy gedigte voorlees. Hy stig die uitgewer Piquant Publications wat sy vroeëre werk in verwerkte en aangevulde vorm heruitgee, asook twee nuwe digbundels. Hy woon in Johannesburg en is 'n toegewyde Moslem.

Skryfwerk wysig

Sy gedigte spreek van liefde en swaarkry, individualisme, hoogmoed, trots en verraad, menslike en omgewingsprag en die weerstand teen onderdrukking. Hy bewoord dit met ewe groot gemak op liriese en platvloerse wyse, in standaard en slengtaal. Hy skryf hoofsaaklik in Engels, maar sluit wel 'n paar Afrikaanse gedigte (in die tsotsitaal en Kaaps) in sy Engelse digbundels in. Sy debuutbundel, “The time of our lives”,[1] word deur vele uitgewers afgekeur en hy gee dit daarna self uit. Die bundel weerspieël die onstuimigheid en weerloosheid van lewe onder apartheid, sowel as die behoudende krag van die liefde in hierdie tye. “A celebration of flames[2] sit die trant van sy debuutbundel voort en bevat gedigte oor persoonlike gedagtes, verhoudings, sosiale interaksie en politieke temas.[3] Die bundel is primêr politieke versetpoësie teen die ongeregtighede van apartheid, maar is nie slegs oppervlakkige moralisering en twee-dimensionele anti-apartheidsverklarings nie. Die broederskap en toenadering tussen die United Democratic Front en die swart bewussynsbewegings word aan dieselfde kritiese oog onderwerp, sodat die etiese en morele verklarings oor die totale spektrum weerklink, beide teen die ongeregtighede van die bewindhebbers en van diegene wat hulle teenstaan. So maak hy die deur oop vir ander om ook 'n meer kritiese rol te vertolk, eerder as blinde ondersteuning van die anti-apartheidsbewegings. Hierdie bundel word ook in Amerika uitgegee. In 1987 verower “A celebration of flames” die AA Mutual/Ad Donker-prys. Hy verkies om nie teenwoordig te wees tydens die oorhandiging seremonie van die prys in die Stadskouburg in Johannesburg nie, aangesien hy voel dat hy tussen die mense oor wie hy dig moet wees en hy sien die Stadskouburg as 'n simbool van die apartheidstaat. Die beoordelaars prys die manier waarop hy die komplekse elemente van sosiale en politieke ineenvleg met intens persoonlike verhoudings. “Bra Frooks…” bevat gedigte wat in slengtaal geskryf is en op gevatte, humoristiese, sarkastiese en satiriese wyse die teenstrydighede en emosionele terrein van beide die apartheid en post-apartheid eras uitbeeld. Hierin gebruik hy die taal, stem en logika van die gewone mens op straat om die absurditeit van politieke onderdrukking en sosiale beheer en die skynheiligheid van politieke dogma bloot te stel. Die deursettingsvermoë van mense vasgevang in onderdrukking en hulle vermoë om die snaakse kant te vind en die stiksienigheid van die onderdrukkers word hier treffend vasgevang. “The wind still sings sad songs” en “I dream in long sentences” is bundels met nuwe gedigte.[4]

Sy gedigte word in verskeie tale vertaal en van sy gedigte word opgeneem in Gerrit Komrij se bloemlesing “Die Afrikaanse poësie in 'n duisend en enkele gedigte”, insluitende “Die Gujhajie”. Hierdie gedig, geskryf in Kaaps, handel oor 'n Moslem wat van plan is om na Mekka te gaan sodra hy genoeg geld gespaar het, maar wat intussen sy naweke op die afgebakende apartheidstrande deurbring omdat hy hier meer beskerm voel teen die ongewenste swart mense. Sy gedigte verskyn ook in talle Engelse versamelbundels. In 1980 word sy gedig. “Possibilities for a man hunted by SBs", gekies om Suid-Afrika in die International Portland Review te verteenwoordig.[5]

Sadness in the house of love” is 'n roman wat tydens apartheid in Kaapstad afspeel. In hierdie onstuimige politieke toestande raak Siddique en Wasiela verlief op mekaar.[6][7]

Publikasies wysig

§ 1982

  • The Time Of Our Lives (1982, 2007, 2014): gedigte in Engels: [1][dooie skakel],[2].

§ 1987

  • A Celebration Of Flames (1987, 2007, 2014): gedigte in Engels, Wenner van die Vita Award: [3][dooie skakel],[4].

§ 2006

  • The Wind Still Sings Sad Songs (2006, 2014): gedigte in Engels: [5][dooie skakel],[6].
  • Bra Frooks … (2006, 2014): gedigte in Engels, Afrikaans, kaapse 'skollie' en 'tsotsi-taal'. [7][dooie skakel],[8].

§ 2015

  • I Dream In Long Sentences (2015): gedigte in Engels.
  • Sadness In The House Of Love (roman, 2015): roman in Engels.

§ 2016

  • The Gathering Of The Storm (2016): roman in Engels.
  • Weapons of Words (2016): vergelykende literatuur & literêre kritiek.

§ 2017

  • The Paanies Are Coming (2017): kortverhale in Engels, Afrikaans, 'durbanite', kaapse 'skollie' en 'tsotsi-taal'.
  • In The House Of Love (2017): roman in Engels, Afrikaans, kaapse 'skollie' en 'tsotsi-taal'.

§ 2019

  • This Masquerade (2019): kortverhale in Engels.

Bronne wysig

  • Asvat, Farouk “Our anquish and quest” “Sowetan” 6 Mei 1987
  • Asvat, Farouk “Artist’s function is to master his craft” “Sowetan” 13 Mei 1987
  • Asvat, Farouk “Third World view is vital” “Sowetan” 20 Mei 1987
  • Asvat, Farouk “The problems with South African fiction” 27 Mei 1987
  • Faller, Francis “The doctor prescribes poetry” “October Tribute”, Oktober 1987
  • Harber, Anton “Out of an angry silence, a polished poet is born” “Weekly Mail” 14 Augustus 1987
  • Farouk Asvat op everybodywiki

Verwysings wysig

  1. Martin, Andrew “NELM News” Junie 2008
  2. Anonymous “New Nation” 29 Oktober 1987
  3. Martin, Andrew “NELM News” December 2008
  4. Esaach: http://www.esaach.org.za/index.php?title=Asvat,_Farouk
  5. Farouk Asvat: http://faroukasvat-poems.blogspot.co.za/
  6. Kaganof 8 November 2007: http://kaganof.com/kagablog/2007/11/08/straight-talk-from-bra-frooks-the-legend-of-farouk-asvat/ Geargiveer 21 Oktober 2015 op Wayback Machine
  7. Kaganof 8 December 2007: http://kaganof.com/kagablog/2007/12/08/hybridization-and-slang-in-south-african-poetry-2/ Geargiveer 3 Oktober 2018 op Wayback Machine