Monte Carlo
Monte Carlo (Frans: Monte-Carlo, Monegaskies: Monte-Carlu) is die vernaamste woonkwartier van die stadstaat Monaco, 'n onafhanklike prinsdom aan die Franse Côte d'Azur (Middellandse See).
Monte Carlo Monte-Carlo / Monte-Carlu Spélugues | |
|---|---|
 'n Uitsig oor Monte Carlo (en Monaco) soos vanaf die ooste gesien. | |
  Monte Carlo | |
| Koördinate: 43°44′23″N 7°25′38″O / 43.73972°N 7.42722°O | |
| Land |  Monaco |
| Stigting | 1 Julie 1866 |
| Oppervlak | |
| • Totaal | 0,61 km2 (0,234 vk. myl) |
| Bevolking | |
| • Totaal | 14 586 |
| Poskode | 98000 |
| Skakelkodes | 0377 |
| Webwerf | monte-carlo.mc |
Die buurt dra sy Italiaanse naam sedert 1 Julie 1866 ter ere van Prins Charles III van Monaco. Die snelle groei van Monte Carlo het anderkant die grens tot die stigting van 'n Franse voorstad, Beausoleil, gelei.
Geskiedenis
wysig
Die Prins van Monaco verleen in 1856 sy toestemming om 'n kasino in Monaco te open. Die eerste instelling in die historiese stadskern van Monacostad (Monaco Ville of Munegu Autu), wat in 1862 ingewy is, raak nie regtig gewild nie. Een jaar later word 'n beskeie gebou in Monte Carlo opgerig. Dinge verander drasties met die koms van François Blanc, die voormalige direkteur van die kasino in Bad Homburg, 'n luukse spa in die huidige Duitse deelstaat Hesse. Danksy die talent en die kapitaal van hierdie nuwe lisensiehouer ontwikkel die kasino tot 'n gewilde ontmoetplek vir die welgesteldes, en sy oorspronklike gebou word deur 'n luukse paleis vervang.
Die kasino, wat deur tuine omring word, spog met 'n terras wat 'n uitsig oor Monaco en tot by die Italiaanse Bordighera bied. Die huidige gebouekompleks bestaan uit die ou wesvleuel aan die seekant, wat in 1878 deur die argitek Charles Garnier opgerig is. Die jongste deel van die gebou dateer uit die jaar 1910 en huisves die teater en speelhalle met hulle pragtige muurtapyte, skilderye en goudversierings.
Erwe is skaars in Monte Carlo, en die huidige stadshorison word veral sedert die sewentigerjare van die 20ste eeu deur woonstelblokke gekenmerk.
Eksterne skakels
wysig
Wikimedia Commons het meer media in die kategorie Monte Carlo.- (fr) Amptelike webwerf
- 'n Panoramiese uitsig oor Monte Carlo - benodig Quicktime-sagteware
