Nebelung

	Nebelung
Land	VSA
Soort lyf	Lank, stewig
Pels	Halflank, dig
Spesiale eienskappe	Bossies hare agter die ore en tussen die tone
	Wetenskaplike naam
	Felis catus (huiskat)
Portaal	Katte

Die Nebelung is ’n seldsame katras met lang lywe, groen oë en ’n halflang, digte pels. Die naam – oënskynlik ’n samesmelting van die Duitse woord Nebel (mis) en die Middeleeuse Duitse saga Nibelungenlied – is waarskynlik vanweë die kat se kenmerkende syagtige blou-grys pels asook die ras se stamouers, wat genoem is na twee hoofkarakters in die Nibelungenlied, die Duitse vegter Siegfried en die Yslandse koningin Brunhilde.

Geskiedenis

Cora Cobb, die eienaar van Siegfried (1984) en Brunhilde (1985), was baie beïndruk met die mooi blou-grys katte. Hulle het soos Russiese bloukatte met ’n halflang, ligte pels gelyk. Saam met die genetikus dr. Solveig Pfleuger het sy ’n standaard vir die katte opgestel volgens dié vir die Russiese bloukat, maar met ’n verskil: die lengte van die pels.

The International Cat Association (TICA) was die eerste vereniging wat die Nebelung erken en ’n teelstandaard verskaf het. Die doel van die teelprogram is om blou katte te produseer met dieselfde voorkoms as die katte wat in die 19de en laat 20ste eeu uit Rusland ingevoer is en dit te kombineer met ’n halflang, blink pels.

Benewens TICA erken die Amerikaanse Cat Fanciers Association (FCA), die Wêreldkatfederasie (WCF), Livre Officiel des Origines Félines (LOOF) en onafhanklike verenigings in Nederland, België en Duitsland hulle. Die beskikbaarheid van die ras is redelik beperk.

Beskrywing

Een woord beskryf die Nebelung goed: lank. Dit het ’n lang en grasieuse lyf en nek, lang bene, lang pels en lang stert. Die effens ovale oë is heldergroen of soms geel-groen. Die gesig is meer gepunt as rond. Die algemene voorkoms is dié van ’n lang, stewige, goed gespierde kat. Die dubbele pels voel sag en syagtig; dit is ’n pragtige grys kleur met silwer punte. Veral mannetjies het ’n kraag om die nek en die hare aan die stert is langer as aan die lyf. Daar is bossies hare agter die ore en tussen die tone. Die Nebelung word sowat 16 jaar oud en weeg tot 9 kg.

Hulle is lewendig, spelerig, lieftallig en intelligent. Al is hulle so aktief, aard hulle goed binnenshuis. Hulle vorm hegte bande met individuele mense en is skugter voor vreemdelinge. Hulle is baie vol fiemies as dit by kos en skoon sand kom en sal hul eienaars laat weet as hulle ongelukkig is. Hulle hou ook van roetine.

Sien ook

Lys van katrasse

Eksterne skakels

Cat Connect – Nebelung Geargiveer 11 Januarie 2012 op Wayback Machine
Nebelung-genetika Geargiveer 29 September 2007 op Wayback Machine
Wikimedia Commons het meer media in die kategorie Nebelung.
Hierdie artikel is vertaal uit die Engelse Wikipedia