Nieuwsblad van het Noorden

Nieuwsblad van het Noorden was van 1888 tot 2002 'n koerant vir die noordelike streke van Nederland. Dit is deur Hazewinkel Pers in Groningen uitgegee. Op 1 April 2002 smelt Nieuwsblad van het Noorden met die Groninger Dagblad en die Drentse Courant saam om die Dagblad van het Noorden te vorm.

Plakaat van Nieuwsblad van het Noorden uit 1900.

Vroeë geskiedenis wysig

Die eerste eksemplaar van die koerant verskyn op 2 Junie 1888. Dié nie-partygebonde koerant kom aanvanklik slegs op Woensdae en Saterdae uit en kos 2 sent per los eksemplaar. Die uitgewer was die joernaliste Joan Nieuwenhuis (1856–1939). Enkele maande later neem die drukker Ruurt Hazewinkel Jzn. (1855–1940) die koerant oor.

Oorlogsjare wysig

Tydens die eerste vier jaar van die Tweede Wêreldoorlog is Nieuwsblad van het Noorden steeds uitgegee omdat die redaksie 'n welwillende houding ingeneem het teenoor die Duitse besetters. Toe die aanstelling van 'n hoofredakteur uit die Nationaal-Socialistische Beweging egter geweier word, word 'n verskyningsverbod in Julie 1944 op die koerant geplaas. Op 26 Januarie 1946 verskyn die koerant egter weer in 'n oplaag van 35,000 eksemplare.

Die Groningense skrywer Johan van Gelder het in 2001 'n boek aan die oorlogsperiode gewy.[1] Hierin wys hy op die destydse pro-Duitse houding van die koerant, en meen hy verder dat die verskyning van die koerant gestaak moet word. Van Gelder het die uitgewers, die broers Hazewinkel, verwyt dat hulle ten alle koste hul familiebedryf in stand wou hou, en nie aan die moontlike gevolge van hul beleid gedink het nie. Dit was volgens hom geen "daad van bovengronds verzet", soos die Hazewinkels beweer nie. By die verskyning van die boek het die direkteur van die saak, Gijs Lensink, Van Gelder se aantygings "zwaar" en "niet terecht" genoem.[2]

Ger Vaders was van 1961 tot 1987 die hoofredakteur van die koerant. Hy het landswyd bekendheid verwerf toe hy 'n passasier was van 'n trein wat in Desember 1975 vir twaalf dae gekaap is. Na die gebeurtenis het hy verslag gelewer van sy ervaring in Nieuwsblad onder die titel Gevallenen uit Gods hand.[3] Aan die einde van die sewentigerjare het hy egter rusies met die redaksie gehad, waarna hy die daaglikse bestuur van die koerant oorgedra het.

Kantoor wysig

 
Die kantoor van Nieuwsblad in Zuiderdiepstraat

Nieuwsblad was vir geruime tyd gevestig in 'n eiendom in Gedempte Zuiderdiep ('n straat in Groningen, dikwels kortweg bekend as Zuiderdiep of Gronings Suderdaip). Die gebou uit 1903 is ontwerp deur Gerrit Nijhuis en is 'n rijksmonument. Die koerant het in 1997 na 'n nuwe gebou in Lübeckweg verhuis.

Verwysings wysig

  1. Het schandaal: de 'aanpassing' van het Nieuwsblad van het Noorden. Elbaz Books. 2001. ISBN 90-803703-4-7.
  2. Karin de Mik (1 September 2000). "Boek over geschiedenis van Nieuwsblad van het Noorden". NRC Handelsblad.
  3. "Film over Molukse treinkaping Wijsterauthor =". Elsevier. 28 Maart 2007.

Eksterne skakels wysig