Vredespark
'n Vredespark, of oorgrensbewaringsgebied, is 'n beskermende gebied wat dwarsoor die grense van verskeie lande strek. Die politieke landsgrense van die verskillende lande waarbinne die park lê, word verwyder. Dit sluit in die verwydering van heinings en grensdrade sodat diere en mense vry kan beweeg binne die gebied. 'n Grens mag wel rondom die gebied behou word om onwettige grenskruisings te voorkom. Gebiede soos hierdie is in Engels bekend as Transfrontier Conservation Areas (TFCAs) of Peace Parks.
Die grootste rede vir die stigting van vredesparke is die beskerming van tradisionele migrasiepatrone van diere, wat genoeg voedsel- en waterbronne verseker vir populasiegroei. Vredesparke moedig ook toerisme aan, asook ekonomiese ontwikkeling en diplomatieke betrekkings tussen buurlande.
