Oriënt-eksprestrein

Die Oriënt-eksprestrein was oorspronklik 'n luukse trein van die Compagnie Internationale des Wagon-Lits (CIWL) wat Parys met Konstantinopel (later Istanboel) verbind het.

Een van CIWL se slaapwaens

'n Oorspronklike roetebord wat in die Duitse spoorwegmuseum Bochum-Dahlhausen vertoon word

'n Oorsig oor die oorspronklike treinroetes

Orient-Express (1888)

Hierdie sneltrein, waarna dikwels as die "koning van treine" of "die trein van konings" verwys word, was die kernelement in 'n hele luukse passasierstreinstelsel wat veral Parys en seehawens langs die Engelse Kanaalkus met 'n verskeidenheid bestemmings in Sentraal- en Oos-Europa asook op die Balkan-skiereiland verbind het.

Ná die Tweede Wêreldoorlog het luukse treinreise minder gewild geraak, en die Oriënt-ekspres is tot 'n gewone sneltrein afgeskaal. Die laaste oorblyfsel van die oorspronklike treinroete was 'n trein wat as "Orient Express" vanaf Junie 2007 op die roete tussen Straatsburg en Wene gery het. Toe 'n nuwe treinrooster in Desember 2009 ingestel is, is ook hierdie laaste treinroete – en sodoende ná 126 jaar ook die Oriënt-ekspres as geskeduleerde treinroete – gekanselleer.

Sedert die middel van die 1970's bied 'n aantal spoorwegmaatskappye spesiale treinritte met gerestoureerde spoorwaens van die ou CIWL aan. Hierdie treine, wat nie op die treinroosters van Europese spoorwegmaatskappye gelys word nie, ry gedeeltelik op die tradisionele roetes van die historiese Oriënt-ekspres en sy sustertreine. Hul name is ook van die voormalige Oriënt-ekspres afgelei.

Die Oriënt-eksprestrein het ook sy weg tot die literatuur en filmwêreld gevind, veral met Agatha Christie se misdaadroman Murder on the Orient Express.