Orsat gasanalise

Orsat gasanalise is 'n metode wat gebruik word in die analise van uitlaatgasse. Die apparaat wat gebruik word kan in die meegaande illustrasie gesien word. Die apparaat bestaan uit 'n buret (A) wat tipies gegradeer is tot en met 100 kubieke sentimeter. Die buret is in 'n watergevulde houer om te verseker dat die digtheid van die gas nie verander en die resultaat beïnvloed nie. Die apparaat bestaan tipies uit vier pipette (B, C, D en E). Die chemikalieë in die pipette is as volg:

• B - Kaliumhidroksied vir die absorpsie van koolstofdioksied.
• C - Alkaliese oplossing van Pirogallol vir die absorpsie van suurstof.
• D en E - Suur-oplossing va KoperChloried vir die absorpsie van koolstofmonoksied.

Apparaat vir die Orsat analise

Elkeen van die pipette word met glasstafies gevul sodat die oplossings daaraan klou wanneer die vlak in die pipet daal en sodoende goeie kontak met die gas verseker word. Pipette D en E word ook met koperdraad gevul om die koperchloried oplossing te versterk na die koolstofmonoksied dit uitgeput het. Elke pipet word verbind met 'n rubbersak (K) om die oplossing teen die inwerking van die suurstof in lug te beskerm.

Werking

Die buret (A) word tipies gevul met 'n natriumchloried-oplossing. Die gas word deur die U-buis (H) in die buret ingesuig deur die vlak van die oplossing in die buret te verlaag deur die oplossing in die buret te laat uitloop na die bottel gemerk F in die meegaande skets. Die U-buis word gewoonlik gevul met 'n filtreermateriaal om die gas te suiwer alvorens dit in die buret beland. Om kontaminasie van die gasmonster deur die lug in die buisies bo die pipette teen te werk kan die volume van die lug daar so laag as moontlik gehou word en die bottel F weer opgelig word om die oplossing se vlak weer te verhoog om die monster 'n paar keer weer af te blaas na die atmosfeer. Na die lug uitgeblaas is word die vlak van die oplossing na die nul merk in die buret verlaag en die klep G daarna toegedraai om die monster in die apparaat te behou. Die klep bo pipet B word dan oopgedraai en die gasmonster in die pipet ingestoot deur die bottel F bo op die raam te plaas. Die vlak in die pipet word dan weer herstel na waar dit was deur die bottel te laat sak. Die proses word herhaal totdat die lesing op die buret A konstant bly. Die volume verandering word dan aangeteken en die proses herhaal met pipette C, D en E om die hoeveelheid suurstof en koolstofmonoksied te bepaal.

Verwysings

Steam, Its Generation and Use Geargiveer 26 November 2011 op Wayback Machine, Babcock & Wilcox, 1919, Bl. 155 - Boek op Projek Gutenberg.