Oxford Street

Oxford Street is 'n belangrike straat in die City of Westminster in die West End van Londen. Dit staan bekend as Europa se besigste winkelstraat met sowat 300 winkels aan weerskante, waaronder bekende Britse afdelingswinkels soos John Lewis, Debenhams, House of Fraser, Marks & Spencer, Topshop en Selfridges, en lok daagliks sowat 'n halfmiljoen besoekers.

'n Uitsig oor Oxford Street in westelike rigting, met die afdelingswinkel Selfridges in die agtergrond

Oxford Street het oorspronklik deel uitgemaak van Oxford Road, die pad wat Londen met Oxford verbind het en vanaf Newgate in die City of London na die beroemde universiteitstad geloop het. Tans maak dit deel uit van die A40-hoofpad, maar net soos in die geval van baie ander strate in Sentraal-Londen wat nie meer as verbypaaie dien nie, is daar geen borde meer wat die padnommer aandui nie.

Halfpad straat-op lê Oxford Circus, Oxford Street se besige kruising met Regent Street. Hier is in 2009 'n diagonale voetgangersoorgang geopen wat tans die enigste van sy soort in Sentraal-Londen is.