Parameter

’n Parameter (van die Griekse woorde παρά para, "benewens, plaasvervanger", en μέτρον metron, "mate") is oor die algemeen ’n eienskap wat kan help om ’n spesifieke stelsel (bedoelende ’n gebeurtenis, projek, voorwerp, situasie, ensovoorts) te definieer of klassifiseer. Dit is dus ’n element van ’n stelsel wat nuttig, of noodsaaklik, is vir die identifikasie van die stelsel, of vir wanneer die stelsel se werking, status, toestand, ensovoorts beskryf word.

Die term "parameter" het baie spesifieke betekenisse in verskillende dissiplines, soos wiskunde, rekenaarprogrammering, ingenieurswese, statistiek en linguistiek.

Modellering

Wanneer ’n stelsel deur vergelykings gemodelleer word, word die waardes wat die stelsel beskryf parameters genoem. in meganika, byvoorbeeld, verskyn die massas, afmetings en vorms (van soliede voorwerpe) en die digthede en vloeitraaghede (van vloeistowwe) as parameters in die vergelykings wat bewegings modelleer. Daar is dikwels verskeie keuses vir die parameters, en die keuse van ’n gerieflike stel parameters word parametrisering genoem.

As ’n mens byvoorbeeld die beweging van ’n voorwerp beskryf op die oppervlak van ’n sfeer wat baie groter as die voorwerp is (byvoorbeeld die aarde), is daar gewoonlik twee algemeen gebruikte parametriserings van sy posisie: hoekkoördinate (soos lengtegraad/breedtegraad) wat bewegings met ronde sirkels aan die sfeer langs beskryf, en rigtingafstand van ’n bekende punt af (byvoorbeeld "10 km NNW van Kaapstad"), wat gewoonlik eenvoudiger is vir beweging op kleiner skaal, veral binne ’n streek.

Skakels

• Hierdie artikel is in sy geheel of gedeeltelik uit die Engelse Wikipedia vertaal.