Paul Krugerbrug
Die Paul Krugerbrug (beter bekend as Begin der Lijnbrug) is ‘n brug oor die Vaalrivier op ‘n voorheen belangrike roete tussen Lydenburg en KwaZulu-Natal.
Die brug is by 26° 46′ 13″ suid en 29° 55′ 23″ oos. Dit is 10½ km noord van Amersfoort op die pad suidwaarts van Ermelo na Amersfoort en Volksrust en net oos van die N11-hoofroete.
Sytze Wierda, die staatsargitek van die ZAR, was meer ten gunste daarvan om brûe te bou van plaaslike klip as om moderne brûe van staal uit die buiteland in te voer. In 1898 was daar dus reeds 5 sulke klipbrûe in die land in gebruik.
Op 5 Junie 1896 het die Uitvoerende Raad van die ZAR aan Wierda opdrag gegee om hierdie brug te ontwerp en te laat oprig. Dit is in 1896-97 deur die bou-aannemer Johannes van Waart gebou uit sandsteen uit die Vaalrivier. Met die lengte van 124m was dit op daardie tydstip die langste klipboogbrug in die land. Dit bestaan uit 10 boë van 9,14 m elk en het ‘n breedte van 6,74 m.
Kommandant-generaal Piet Joubert en mev. Tobias Smuts het die brug op 12 April 1898 as die Paul Krugerbrug ingewy. Aangesien die brug naby die beginpunt van die destydse grenslyn tussen die ZAR en Swaziland geleë was, het dit in die volksmond die naam van die Begin der Lijnbrug gekry.
Die brug is op 23 Desember 1955 tot monument verklaar.
Bibliografie wysig
- artefacts.co.za