Petersen Automotive Museum
| Petersen Automotive Museum | |
| |
Die Petersen Automotive Museum
Foto geneem deur David Zaitz | |
| Plek | Los Angeles |
|---|---|
| Land |  Verenigde State
|
| Openingsjaar | 1994 |
| Geopen deur | Robert E. Petersen |
| Tipe museum | Motormuseum |
| Webtuiste | Petersen Automotive Museum |
Die Petersen Automotive Museum is een van die wêreld se grootste motormuseums, geleë in Los Angeles, Kalifornië in die stadsbuurt Miracle Mile in Wilshire Boulevard, waar dit deel uitmaak van die sogenaamde Museum Row - 'n kompleks van museums en kulturele instellings met Los Angeles County se Kunsmuseum as ankerpunt.[1] Die museum word bestuur deur die Petersen Automotive Museum Foundation, 'n stigting en 'n organisasie sonder winsoogmerk wat met die museum en sy vaste en wisselende uitstallings op die geskiedenis van motors, hul impak op wêreldwye leefstyle en kultuur (met Los Angeles as voorbeeld en vertrekpunt) en verwante opvoedkundige programme fokus.[2]
Foto geneem deur David Zaitz
As deel van 'n omvattende opknappingsprogram is die museum in 2015 van 'n nuwe opspraakwekkende fasade van staalstrepe voorsien wat beweging en spoed versinnebeeld.
Geskiedenis
wysigDie museum, wat op 11 Junie 1994 deur die tydskrifuitgewer en filantroop Robert E. Petersen (1926–2007) en sy vrou Margie (1935–2011) gestig is, is tans in besit van die Petersen Automotive Museum Foundation wat dit ook bestuur. Die museum se versamelings is aanvanklik in die Museum vir Natuurgeskiedenis (Natural History Museum) van Los Angeles County vertoon voordat hulle na die huidige museumgebou, 'n voormalige afdelingswinkel, verskuif is.
Die gebou is oorspronklik ontwerp deur Welton Becket (1902–1969), 'n boorling van Seattle wat hom later as argitek in Los Angeles gevestig en hier talle geboue volgens sy konsep van "totale ontwerp" opgerig het (sy ateljee het na alle aspekte van 'n nuwe bouprojek omgesien, van sy beplanning tot die ontwerp van sy interieur en die landskapsargitektuur van die omgewing).
Die afdelingswinkel is in 1962 as 'n kortstondige Amerikaanse filiaal van die Japannese afdelingswinkelketting Seibu Department Stores geopen en vervolgens tussen 1965 en 1986 deur die Amerikaanse afdelingswinkelketting Ohrbach's bedryf. Ses jaar nadat die afdelingswinkel sy deure vir goed gesluit het, het Robert Petersen die grotendeels vensterlose gebou by die kruising van Fairfax Avenue en Wilshire Boulevard as 'n uiters geskikte plek vir sy museum gekies waar die voorwerpe van sy versameling nie aan die skadelike ultraviolette straling van sonlig blootgestel word nie.
Verwysings
wysig- ↑ tripsavvy.com: Museum Row on the Miracle Mile in Los Angeles
- ↑ "petersen.org: About. Besoek op 25 Mei 2018". Geargiveer vanaf die oorspronklike op 6 September 2018. Besoek op 25 Mei 2018.
Eksterne skakels
wysig
Wikimedia Commons het meer media in die kategorie Petersen Automotive Museum.- (en) Amptelike webwerf
