Projek Dina
|
Hierdie artikel bevat nie ’n bronnelys nie, wat beteken dat die inhoud nie geverifieer kan word nie. Enige bevraagtekende inligting mag dus ook mettertyd verwyder word. Help Wikipedia deur betroubare bronne tot die artikel by te voeg. |
Projek Dina is 'n Afrikaanse dramareeks wat op KykNET, DStv kanaal 144 uitgesaai word.
| Projek Dina | |
| Genre | Drama |
|---|---|
| Geskryf deur | Marcel van der Watt Bianca van Aswegen Nicky Reeder |
| Taal | Afrikaans |
| Aantal seisoene | 3 |
| Aantal episodes | 33 |
| Produksie | |
| Looptydperk | ~ 48 minute |
| Produksiemaatskappy | Penguin Films |
| Uitsending | |
| Oorspronklike kanaal | kykNET |
| Beeldformaat | HD |
| Oorspronklike lopie | 14 Januarie 2020 |
Projek Dina speel af in die werks- en lewensomgewing van die blitsreaksie-taakspan, waar die druk hemelhoog en die ruimte vir foute piepklein is. Noudat die taakspan pas saamgestel is deur die Wes-Kaapse polisie – as ’n manier om die vinnigtoenemende gevalle van vermiste persone in Suid-Afrika te bestry – het die lede van die taakspan ’n skynbaar onmoontlike taak op hande: om die vermiste persone in Kaapstad op te spoor en hulle een vir een huis toe te bring.
Reekse wysig
| Reeks | Episodes | Oorspronklik uitgesaai | ||
|---|---|---|---|---|
| Eerste uitgesaai | Laaste uitgesaai | |||
| 1 | 13 | 14 Januarie 2020 | 7 April 2020 | |
| 2 | 10 | 1 Maart 2022 | 3 Mei 2022 | |
| 3 | 10 | 9 Mei 2023 | 11 Julie 2023 | |
Produksie wysig
Elke vyf uur word ’n kind in Suid-Afrika as vermis aangemeld. Ongeveer 30% van vermiste kinders word nooit gevind nie, terwyl 50% van vermiste volwassenes nooit weer gesien word nie. – SAPD Vermistepersoneburo, 2013
Tydens hierdie pogings sien kykers hoe drie speurders, spesifiek uitgesoek deur brigadier Patricia Dlomo, dae aaneen werk sonder om te slaap, hoe hulle regdeur die nag oproepe maak en ontvang, en hoe hulle die Kaap se gevaarlikste hoekies betree.
Die leier van die span, kaptein Deon Visagie (gespeel deur Tim Theron), is van nature ’n strateeg en ’n ware speurhond. Hy raak obsessief oor die kleinste detail, maar sy vermoë om mense te lees skiet erg tekort. Hy sukkel veral met sersant Lux Dladla (Chumani Pan) se benadering tot speurwerk, wat staatmaak op ‘n sterk intuïsie en die vermoë om ‘n groot netwerk van kontakte op te bou en te benut.
Die taakspan gebruik die hulp van ‘n nie-amptelike informant – die vernuftige kuberkraker Charlene “Charlie” Botha (Kay Smith). Selfs Charlie besef egter vinnig dat dié speurtogte haar in meer gevaar plaas as wat sy ooit kon verwag. En die inligting wat sy verskaf is nie altyd betroubaar nie...
Adjudant-offisier Ronel Oosthuizen (Chanelle de Jager) is die persoon wat die span bymekaarhou. Sy is eerlik, hardwerkend, ’n familiemens, maar ’n persoon wat jy nie mee sukkel nie. Sy hou nie van kleinighede nie en word gereeld in die middel geplaas wanneer Deon en Lux koppe stamp, maar sy weet presies hoe om hulle te hanteer. Sy is ook die een wat die taakspan “Projek Dina” doop.
Voormalige Valke-ondersoeker Marcel van der Watt en Missing Children SA se Nicky Rheeder en Bianca van Aswegen het as konsultante opgetree vir die reeks. Projek Dina is geïnspireer deur ware verhale en is met hierdie speurders se gesamentlike kennis geskryf.
Projek Dina word vervaardig deur Penguin Films, wat ook Sara se Geheim, Arendsvlei, en flieks soos Krotoa vervaardig het.
Rolverdeling wysig
- Tim Theron as kaptein Deon Visagie
- Chumani Pan as sersant Lux Dladla
- Kay Smith as Charlene "Charlie" Botha
- Chanelle de Jager as adjudant-offisier Ronel Oosthuizen
- Lee-Ann van Rooi as Brenda Klaasen
- Henré Pretorius as Wynand Oosthuizen
- Chiara Roodt as Mia Oosthuizen
- Jana Strydom Kruger as Karen Schoeman
- Crystal Donna Roberts as Bonita
- Laudo Liebenberg as Zander Marais
Episodes wysig
Reeks 1 (2020) wysig
| No. algeheel |
No. in reeks |
Episode | Oorspronklike uitsaaidatum |
|---|---|---|---|
| 1 | 1 | Die lede van die nuwe Taakspan vir Vermiste Persone het van dag een af hul hande vol, wanneer 'n vierjarige seun uit 'n winkelsentrum verdwyn. | 14 Januarie 2020 |
| 2 | 2 | Deon is op die spoor van twee meisies van Langa wat onafhanklik as vermis aangemeld is. Lux besef 'n vermiste meisie van Welgemoed is meegesleur deur 'n donker kant van sosiale media. | 21 Januarie 2020 |
| 3 | 3 | Die span werk op 'n hoë profiel saak van 'n vrou wie se tweede kind ontvoer is. Ná 'n nuwe leidraad vat Deon en Lux 'n ou saak aan van 'n paartjie wie se baba 20 jaar gelede ontvoer is. | 28 Januarie 2020 |
| 4 | 4 | Almal is aan boord wanneer 'n jong meisie uit die voorhof van haar huis verdwyn. Deon en Ronel is in 'n wedloop teen tyd om haar te vind, maar is hulle reeds te laat? | 4 Februarie 2020 |
| 5 | 5 | Deon en Lux betree die gevaarlike wêreld van perlemoensmokkelary om 'n minderjarige bendelid op te spoor. 'n Geldverwante sterfte plaas Ronel op die spoor van 'n voortvlugtige swendelaar... | 11 Februarie 2020 |
| 6 | 6 | Lux ondersoek 'n ongeïdentifiseerde man wat by 'n hotel selfmoord gepleeg het, maar dié speurtog ruk hom tot in sy kern. Ronel sukkel om haar professionele masker aan te hou. | 18 Februarie 2020 |
| 7 | 7 | Na aanleiding van 'n vreesaanjaende kringtelevisie-video beland Deon in 'n jaagtog teen tyd om 'n jong vrou te red. Lux raak die spoor byster in sy poging om 'n weduwee by te staan. | 25 Februarie 2020 |
| 8 | 8 | Ronel sukkel om Dina te laat gaan en fokus liewers op die geheimsinnige verdwyning van drie tienermeisies. Sy kyk weer na haar suster se verdwyning en kom tot 'n skokkende besef. | 3 Maart 2020 |
| 9 | 9 | Twee jong meisies verdwyn spoorloos by 'n braai in Bellville. Lux ondersoek vreemde aktiwiteite in die ou slaapkamer van 'n jong man wat al jare gelede verdwyn het. | 10 Maart 2020 |
| 10 | 10 | 'n Vermiste meisie maak kontak met haar ouers en die span word in die gevaarlike wêreld van mensehandel ingesleep. Terwyl Lux en Deon die strate invaar, begin Charlie haar eie ondersoek. | 17 Maart 2020 |
| 11 | 11 | Wanneer 'n sewejarige seun, Danny Roussouw, vermis raak, maak dit 'n ontvoering van 'n ander seun oop - een wat agt jaar gelede plaasgevind het en nooit opgelos is nie. | 24 Maart 2020 |
| 12 | 12 | Die span se leidrade rakende Marie en die mensehandelsindikaat droog op. Die speurders weier egter om moed op te gee, en 'n adrenalienbelaaide soektog volg. | 31 Maart 2020 |
| 13 | 13 | Die ontdekking van 'n vrou se geraamte in Villiersdorp bring inligting te vore wat die polisie dekades lank probeer wegsteek het. Sal dit die raaisel van Dina se verdwyning oplos? | 7 April 2020 |
Reeks 2 (2022) wysig
| No. algeheel |
No. in reeks |
Episode | Oorspronklike uitsaaidatum |
|---|---|---|---|
| 14 | 1 | Die taakspan word weer bymekaargeroep om 'n hoëprofiel-saak te ondersoek maar Ronel is huiwerig om haar veilige nuwe leefstyl op te gee. | 1 Maart 2022 |
| 15 | 2 | 'n Tienermeisie word as vermis aangemeld, en die taakspan vermoed haar stiefpa het iets met haar verdwyning te doen. Ronel beleef spanning in haar huishouding. | 8 Maart 2022 |
| 16 | 3 | Die Taakspan is op soek na 'n vermiste jong model, maar die kinkels in die ondersoek laat verskeie duistere moontlikhede opduik... | 15 Maart 2022 |
| 17 | 4 | Drie mans met soortgelyke gelaatstrekke word as vermis aangemeld, maar die taakspan is angstig om die sindikaat-bedrywighede te onderskoek. | 22 Maart 2022 |
| 18 | 5 | Die Lagoon sindikaat saak loop dood, maar daar is iets agterdogtig aan die gang. 'n Tienerseun raak vermis onder vreemde omstandighede en dit los die eenheid verbysterd. | 29 Maart 2022 |
| 19 | 6 | 'n Kriptiese leidraad oortuig Ronel dat Dina gered wil word. Terwyl Charlie en Lux probeer uitvind wie betrokke is by die sindikaat, moet Deon 'n saak wat 25 jaar oud is probeer oplos. | 5 April 2022 |
| 20 | 7 | Lux en Charlie begin wonder of Magdalena deel is van die sindikaat. Wanneer 'n vermiste jong dame se broer na haar begin soek, stort die nuwe lewe wat sy vir haarself gebou het, in duie. | 12 April 2022 |
| 21 | 8 | 'n Vermiste tiener word gesien waar sy as sekswerker ingespan word. Die taakspan ontvang 'n wenk oor die sindikaat. Ronel is in twee geskeur wanneer sy besef wie die wenk ingebel het. | 19 April 2022 |
| 22 | 9 | Ronel het uiteindelik bewyse dat Dina haar in 'n spesifieke rigting probeer stuur. Deon en Charlie moet vinnig spring en koppe bymekaar sit om 'n vermiste Karen op te spoor. | 26 April 2022 |
| 23 | 10 | Die taak span slaan toe op die sindikaat. Charlie is in gevaar. Dlomo en Lux is op Niewoudt se spoor. Ronel gaan agter haar suster aan en Deon word gekonfronteer deur 'n moeilike besluit. | 3 Mei 2022 |
Reeks 3 (2023) wysig
| No. algeheel |
No. in reeks |
Episode | Oorspronklike uitsaaidatum |
|---|---|---|---|
| 24 | 1 | Nege maande na Dina gered is, keer die Projek Dina-span terug, met 'n onortodokse nuwe leier. Ronel is desperaat om haar verhouding met Dina te herstel, maar daar is 'n nuwe dreigement. | 9 Mei 2023 |
| 25 | 2 | Die span onderbreek hul soektog na Esther om 'n vermiste en emosioneel verbrokkelende jong vrou op te spoor. Hul ondersoek lei hulle na byna 'n dosyn soortgelyke verdwynings. | 16 Mei 2023 |
| 26 | 3 | Die span maak 'n skokkende ontdekking nadat verskeie kerke 'n lidmaat as vermis aanmeld. Generaal Dlomo besoek 'n gevaarlike persoon uit haar verlede vir meer inligting oor Wim. | 23 Mei 2023 |
| 27 | 4 | Ronel en Charlie ontdek 'n onstellende kinkel wanneer hulle 'n vermiste vrou ondersoek. Lux en Zander ondersoek 'n vermiste 'vervelige' man, maar iets broei onder die oppervlakte. | 30 Mei 2023 |
| 28 | 5 | Charlie sukkel om in Lux se prentjie van 'n verhouding te pas. Ronel ondersteun Dina tydens haar hipnose sessies. Die span trek kragte saam om 'n verlore man in die woud op te spoor. | 6 Junie 2023 |
| 29 | 6 | Zander en Lux ondersoek die verdwyning van 'n liggaamsbouer. Ronel ondersoek 'n vermiste liefdadigheidswerker, maar sy donker geskiedenis bevat skokkende onthullings. | 13 Junie 2023 |
| 30 | 7 | Die span ontbloot 'n belangrike bewysstuk rakende Wim se saak. Iemand uit Charlie se verlede smeek haar om drie kwesbare vroue te help. Ronel en Zander jaag om 'n ontvoeringslagoffer te red. | 20 Junie 2023 |
| 31 | 8 | Die balans wat Zander tussen werk en sy persoonlike lewe handhaaf tuimel inmekaar wanneer iemand naby aan sy gesin vermis word. Ronel neem 'n drastiese besluit om haar man en kind te beskerm. | 27 Junie 2023 |
| 32 | 9 | Ronel bedink 'n gevaarlike nuwe plan teen Wim, maar gaan hulle hom finaal kan uitoorlê? Dina probeer uit die huis ontsnap, terwyl Lux en Zander 'n besonder vreemde kinkel in hul saak ontdek. | 4 Julie 2023 |
| 33 | 10 | Wim ontsnap op 'n waaghalsige wyse, en dit lei tot 'n nuwe, hoërisiko-plan deur Ronel. Soos die plan egter uitgevoer word, besef die res van die span Ronel het dalk 'n geheime motivering. | 11 Julie 2023 |