Puteaux
Puteaux (Franse uitspraak: [pyto]) is 'n commune in die westelike voorstede van Parys, Frankryk. Dit is geleë in die hart van die Hauts-de-Seine Département, 8,7 kilometres (5,4 mi) vanaf die middestad van Parys. Met ingang 2016 beskik dit oor 'n bevolking van 44,941 siele.
Puteaux | |
|---|---|
 Rue Voltaire | |
| Koördinate: 48°53′06″N 2°14′20″O / 48.885°N 2.2389°O | |
| Land | Frankryk |
| Streek | Île-de-France |
| Département | Hauts-de-Seine |
| Arrondissement | Nanterre |
| Kanton | Courbevoie-2 |
La Défense, Parys se sakedistrik, waarin van die hoogste geboue in die metropolitaanse gebied voorkom, is versprei oor die noordelike deel van Puteaux en dele van die naburige communes van Courbevoie en Nanterre. Die inwoners van Puteaux word in Frans Putéoliens genoem.
Geskiedenis
wysigDie ontstaan, en stigting van die stad deur die kloostervader Suger kan terugdateer word na 1148. Die stad het toe bekendgestaan as Putiauz.
Die naam Putiauz kom uit die ou Franse woord Putel, wat 'n "moeras" beteken, en waarskynlik verwys na die toestand van die gebied voor die her-organisasie daarvan.
Volgens 'n ander etimologiese verklaring sou die naam Puteaux afkomstig wees van die Latynse puteoli, meervoud van puteolus wat "klein putjie" of "watergat" beteken. Die naam Puteaux kan terugdateer word na die sestiende eeu of sewentiende eeu.
Geografie
wysigPuteaux is geleë aan die linkeroewer van die Seinerivier en grens aan Courbevoie in die noorde, Nanterre in die weste en Suresnes in die suide. In die ooste word Puteaux met Parys verbind by wyse van die brug van Puteaux naby Neuilly asook by wyse van die brug van Neuilly (wat ook gebruik word deur die Paryse Metrolyn 1). Die gebied van die munisipaliteit van Puteaux omvat ook die grootste deel van die Île de Puteaux, aan die Seine.
Distrikte
wysigPuteaux beskik oor verskeie distrikte.
Die distrik Bas de Puteaux, geleë tussen die spoorlyn en die Seine, is die oudste verstedelikte distrik. Opmerklik is veral die ou kerk, die Théâtre des Hauts-de-Seine, die stadsaal en 'n kommersiële winkelsentrum naby die rue Jaurès, Eichenberger en Chantecoq. Die stadsaal is in 1934 gebou en is 'n tipiese voorbeeld van die argitektuur van daardie tyd. Die boulevard Richard Wallace staan bekend as die "Champs-Élysées" van Puteaux.
Die distrik Haut de Puteaux, wat aan die ooste van die spoorlyn geleë is, is 'n meer onlangse distrik en bestaan uit verskeie wonings en HLM-behuising (résidences des rosiers, Cartault, Marcellin Berthelot, Bernard Palissy). Die Lorilleux-woning, byvoorbeeld, is gebou op die terrein van ou inkvervaardigingsmaatskappye.
Die distrik La Défense is in die noorde geleë, geskei deur die sirkelvormige boulevard. Die distrik, wat aan die einde van die 1950's ontwikkel is, is een van die belangrikste sakekerns in Europa. Dit bestaan hoofsaaklik uit kantoorgeboue, maar sommige opmerklike wonings kan ook in die distrik gevind word (Tour Défense 2000, résidence Boieldieu). Twee derdes van die gebied van La Défense is in Puteaux geleë; die res is verdeel tussen Courbevoie en Nanterre. Derhalwe is die CNIT, die Arche de la Défense en die Quatre Temps-winkelsentrum in Puteaux geleë.
Die distrik van Île de Puteaux, waar daar geen wonings is nie, huisves die sportstrukture (tennisbane, sokkervelde, 'n gimnasium en 'n swembad) van Puteaux. 'n Sportkompleks genaamd die Palais des sports is in Julie 2006 geopen.
Politiek
wysigCharles Ceccaldi-Raynaud (UMP) was van 1969 tot 2004 die burgemeester van Puteaux. In 2004 is hy opgevolg deur sy dogter Joëlle Ceccaldi-Raynaud (UMP). Sy is ook tydelik aangestel as parlementslid vir die 6de distrik van Hauts-de-Seine (Puteaux/Neuilly-sur-Seine) in pleks van Nicolas Sarkozy.
Die administrasie van Puteaux deur Ceccaldi-Raynaud is deur sekere mense as outoritêr en tirannies beskou (deur die opposisie, maar soms ook deur sekere mense uit sy eie politieke kamp in Hauts-de-Seine). Hierdie kritiek het gereeld weerklank gevind in die media (soos die dagblaaie Libération, Le Monde, die Hauts-de-Seine-uitgawe van Le Parisien en die nuustydskrif L'Express, wat aan die einde van 2005 'n voorbladstorie daaroor gehad het).
In September 2005 het Charles Ceccaldi-Raynaud aangekondig dat hy van voorneme is om weer burgemeester te word in die plek van sy dogter. Sy dogter het egter geweier om te bedank.
Munisipale administrasie
wysigPersone wat as burgemeester van Puteaux gedien het is:
- Guillaume Nezot (in 1790).
- Pierre Nezot (in 1791).
- Philippe Gault (1791–1795).
- Guillaume Nezot (1795–1800).
- Jean Saulnier (1800–1816).
- Denis Legrand (1816–1826).
- Bernard Gerhard (1826–1831).
- Pierre Langlasse (weier die amp).
- Victor Beau (in 1832).
- Guillaume Julien (1833–1840).
- Claude Pitois (1840–1847).
- Gabriel Panay (in 1848).
- Alfred Michel (1848–1851).
- Jean-Baptiste Léonard (1851–1857).
- Léon Godefroy (1857–1858) (oorlede in die amp).
- Joseph Boucherot (1858–1870).
- Simon-Hyacinte Blanche (in 1870).
- Jean-Théoxene Roque de Fillol (in 1871).
- Arthur Guillaumet (1871–1872).
- Charles Lorilleux (en 1872).
- Auguste Blanche (1872–1880).
- Ernest Francillon (1881–1884).
- Charles Chenu (1884–1894).
- Charles Decroix (1894–1912).
- Lucien Voilin (1912–1925).
- Marius Jacotot (1925–1930).
- Georges Barthélémy (1930–1944).
- Firmin Aury (in Augustus 1944).
- Henri Buisine (Augustus 1944 – 1945).
- Jean Nennig (1945–1947).
- Roger Deniau (1947–1948).
- Georges Dardel (Section française de l'Internationale ouvrière) (1948–1969).
- Charles Ceccaldi-Raynaud (1969–2004).
- Joëlle Ceccaldi-Raynaud (sedert 2004).
Vervoer
wysigPuteaux word bedien deur die Gare de Puteaux-stasie op die Transilien La Défense en Transilien Parys - Saint-Lazare voorstedelike spoorlyne.
Puteaux word ook bedien deur die Esplanade de La Défense-stasie op die Paryse Metrolyn 1 in die sakekern van La Défense, asook deur die La Défense-stasie, 'n groot wisselaarstasie op die Paryse Metro Lyn 1, op Parys se RER lyn-A, op die Transilien La Défense voorstedelike spoorlyn, en op die Transilien Parys; Saint-Lazare voorstedelike spoorlyn. Puteaux word ook bedien deur die T2 tremlyn, op die La Défense-Issy-Val de Seine-lyn.
Kulturele uitbeeldings
wysigPuteaux dien as die toneel vir die rolprent Une aussi longue absence uit 1961, wat die wenner was van die Palme d'Or tydens die Cannes-rolprentfees van 1961.[1][2]
Ou straatname
wysig| Huidige naam | Ou naam |
|---|---|
| rue Bernard-Palissy | rue Charles X |
| rue du bicentenaire | avenue du centenaire |
| quai de Dion-Bouton | quai National |
| rue Jean-Jaurès | rue de Paris |
| rue des Pavillons | rue des Coutures |
| Place de Stalingrad | place du marché |
| rue de Verdun | rue de Neuilly |
| rue Fernand Pelloutier | rue de Denain |
Verwysings
wysig- ↑ "UNE AUSSI LONGUE ABSENCE". Festival de Cannes 2019. Geargiveer vanaf die oorspronklike op 17 Mei 2019. Besoek op 28 Januarie 2021.
- ↑ "Une Aussi Longue Absence (1961, Film) — CinéSéries" – via www.cineserie.com.
Eksterne skakels
wysig| Wikimedia Commons bevat media in verband met Puteaux. |
- Amptelike webblad: mairie-puteaux.fr
- Nie-amptelike webblad, deur 'n plaaslike blogger
- Téléputeaux