Qin Shi Huang (Chinees: 秦始皇, Pinyin: Qín Shǐhuáng, Wade-Giles: Ch'in Shih-huang; persoonlike naam Ying Zheng, Chinees: 嬴政, Pinyin: Yíng Zhèng; * 259 v.C. in Handan, † 10 September 210 v.C. in Shaqiu) het tydens die sogenaamde Periode van die Strydende Ryke tussen 246 en 221 v.C. as koning oor die Qin-staat geheers. In 221 v.C. het hy die eerste keiser geword wat tot met sy afsterwe op 50-jarige ouderdom in 210 v.C. oor 'n verenigde China geheers het.

Qin Shi Huang
Koning van Qin
Keiser van Sjina

Regeer 7 Mei 247 v.C. – 10 September 210 v.C.
Volle naam Qin Shi Huang (秦始皇)
Geboortenaam Ying Zheng (嬴政)
Titels Keiser van die Qin-dinastie
Gebore 259 v.C.
Oorlede 10 September 210 v.C. (op 49)
Voorganger Zhuangxiang, as koning van Qin
Opvolger Qin Er Shi, as keiser van China
Gades
Kinders Fusu
Gao
Jianglü
Huhai, later Qin Er Shi
Adellike huis Qin
Vader Zhuangxiang
Moeder Zhao Ji

Qin Shi Huang bly 'n omstrede persoonlikheid in die Chinese geskiedenis. Ná die vereniging van China het hy saam met sy hoofraadgewer Li Si 'n reeks beduidende ekonomiese en politieke hervormings deurgevoer. Die grootskaalse projekte, wat hy aangepak het, sluit onder meer die Groot Muur van China, sy mausoleum wat die afmetings van 'n klein stad het en deur 'n leër van lewensgroot terrakotta-soldate bewaak word, asook 'n uitgebreide netwerk van nasionale paaie in. Vir hierdie bouwerke en sy hervormings het miljoene mense met hul lewens geboet.

Om die stabiliteit van sy ryk te verseker, het Qin Shi Huang 'n groot aantal boeke verbied en hulle laat verbrand. Ten spyte van sy tirannie en outokratiese heerskappy word Qin Shi Huang as een van die beduidendste heersers in die Chinese geskiedenis beskou.