Raad van die Europese Unie
Die Raad van die Europese Unie is saam met die Europese Parlement deel van die wetgewende tak van die Europese Unie. Byna alle wetgewing in die EU vereis 'n voorstel van die Europese Kommissie. Die meeste voorstelle van die Kommissie vereis gesamentlike aanvaarding deur die Raad en die Europese Parlement.
Dit moet nie verwar word met die Europese Raad, 'n orgaan van die EU wat nie 'n wetgewende funksie het nie, of die Raad van Europa wat 'n heeltemal ander organisasie as die EU is nie.
Die Raad van die EU verteenwoordig die lidlande se regerings. Dit is waar nasionale ministers en kundiges van elke EU-land vergader om:[1]
- EU-wette te onderhandel en aan te neem
- internasionale ooreenkomste namens die EU te sluit
- die EU-begroting aan te neem
- die EU se buitelandse en veiligheidsbeleid te ontwikkel
- die lidlande se beleid in spesifieke velde te koördineer
Die Raad se samestelling verskil saam met die onderwerp wat ter sprake kom. Dit kan bv. bestaan uit die 27 nasionale ministers van landbou of die 27 ministers van omgewingsake. Dit word soms ook die Raad van Ministers genoem of eenvoudig die Raad, maar dit is nie amtelik nie. Sy voorsitterskap word deur een spesifieke land beklee en roteer elke ses maande.
Die meeste besluite in die Raad word deur Gekwalifiseerde Meerderheidsstemming geneem. Dit beteken dat 'n voorstel die steun moet kry van minstens 55% van die lidlande wat saam minstens 65% van die Europese Unie se bevolking verteenwoordig.
Verwysings
wysig- ↑ "What the Council does". Concilium Europese Unie.