Rompslomp

Rompslomp verwys na die rigiede, omslagtige en vertragende handeling en hantering van 'n saak of proses wat volgens die roetine gedoen moet word, wat andersins bespoedig sou wees. Hierdie handeling word bepaal deur die burokrasie en moet nougeset nagekom word. Dit kan ook verwys na die oordrewe verkleefdheid aan formaliteite en regulasies deur die amptenary.

Onnodige administratiewe papierwerk is seker die beste voorbeeld van rompslomp

Omrede tyd geld werd is, kan rompslomp onproduktiwiteit meebring, 'n demper op inisiatief plaas, werkstyd inboet en ekonomiese vooruitgang kniehalter. Toesmeerdery kan ook makliker plaasvind deur die hoeveelheid tyd wat so verlore gaan.

Enkele voorbeelde sluit in:

• Geskrewe papierwerk of briefwisseling wat in detail 'n eenvoudige saak of besluit moet uitpluis (bv. vervoerreëlings en (siekte)verlof).
• Hoogdrawende en omslagtige kantoorjargon wat die leser of aanhoorder vervreem en verwar.
• 'n Probleem of idee wat eers na 'n gesentraliseerde besluitnemingsgesag gestuur moet word.
• 'n Dringende saak bedoel vir die topbestuur wat eers deur die middelbestuur hanteer moet word.
• Dissiplinêre stappe wat tydsaam hanteer word.
• Uitgerekte verpligte vergaderings.
• Lêers en dokumente wat verlê, verlore raak of eenvoudig verdwyn.
• Klante wat moet wag omdat die werknemers hul burokraties-vasgestelde teetyd nuttig.
• Klante wat van bakboord na stuurboord gestuur word (soos deur onderskeie departemente).
• Die gebruik van 'n middelman, pleks van regstreekse kommunikasie, tussen twee partye.
• Kommunikasie wat deur geskrewe posstukke of e-posse, eerder as direkte telefoonoproepe of ontmoetings, moet geskied.
• Individuele werk wat in groepsverband gedoen moet word.
• Verpligte deelname aan spanbousessies, diversiteitsklasse en ander inligtingsessies (soos mediese ondersoeke, stresbestuur, gewigsbeheer, rook, alkoholisme, werksveiligheid en gesonde lewenstyle).
• Die gebruik van voorgeskrewe moderne/ou tegnologie wat ongeskik is vir die werk. 'n Tikster sal byvoorbeeld nie 'n piepklein tabletrekenaartjie vir haar dagtake kan gebruik nie - dit sal net so vertragend wees soos 'n ouer tikmasjien waar foute met moeite uitgewis en oorgedoen moet word.

Afhangend van die werk wat 'n persoon doen, kan die produktiwiteit verhoog word deur die regte toerusting vir die regte werknemer aan te skaf: soos 'n dubbelskerm vir iemand wat in die werkplek gereeld vergelykings moet maak.

Moontlike ideale:

• Beperk papierwerk.
• Gebruik eenvoudige taal by dokumente (veeltaligheid kan ook verwelkom word, indien dit kan) en stel 'n lys op van veelgestelde vrae wat bv. op die Internet beskikbaar is.
• Indien nodig, wis onnodige hiërargiese strukture uit.
• Verminder of raak heeltemal ontslae van die afdeling menslike hulpbronne.
• Beperk vergaderings tot die absolute minimum en moenie sake laat oorstaan nie.
• Som inligtingsessies kort en bondig op in 'n omsendbrief.
• Indien dit kan, laat werkers mekaar aflos eerder as om volgens vaste ure te werk wat die klante of kliënte sal ontwrig.
• Gee werkers die vrymoedigheid om direkte kontak te maak met die bestuur.
• Indien moontlik, verminder die stuur van bakboord na stuurboord deur personeel veeldoelig op te lei (wat verskeie sake kan hanteer): een klant/kliënt kan dus by enige personeellid gehelp word. Indien die personeel wel in 'n gebied spesialiseer, maak vroegtydig (soos by ontvangs) aan die klant/kliënt bekend watter persoon besoek moet word.
• Maak gebruik van kostedoeltreffende en gepaste tegnologie eerder as duur handmatige prosedures.
• Kweek 'n kostebesparende kultuur onder werkers wat tyd en geld betref.