Ruimtelike bewustheid

Ruimtelike bewustheid is die georganiseerde kennis van jouself en ander voorwerpe in ’n gegewe ruimte. Dit is wat argitekte en ingenieurs gebruik wanneer hulle geboue ontwerp. Dit is ook die vaardigheid wat ’n chemikus die driedimensionele struktuur van ’n molekule help beskou of hoe ’n chirurg die menslike liggaam waarneem.

Vir kinders is ruimtelike bewustheid nuttig om rigting, afstand, ligging en dieptewaarneming te verstaan. Bv. As ’n mens in die rigting van 'n bos op 'n fiets ry, sal jy verstaan dat die bome nader aan jou lyf en die fiets kom.

Ruimtelike persepsie is die vermoë om ruimte rondom die liggaam, of die verhouding tussen die voorwerp en die waarnemer te verstaan, bv. die hoed is op my kop.

Daar word dikwels van ʼn individu verwag om besluite te neem wat gebaseer is op visuele inligting. Ruimtelike bewustheid benodig ʼn bewuswording van ʼn individu se posisie in die ruimte, asook die wyse waarop voorwerpe met mekaar verband hou. Dit is die bewustheid van dit wat rondom ʼn mens is, die posisie en grootte van omliggende voorwerpe en die afstand tussen hulle. Hierdie bewustheid van voorwerpe rondom ʼn mens word voorafgegaan deur ʼn individu se akkurate bewustheid van sy eie liggaam. ʼn Eenvoudige vorm van bogenoemde persepsie is om voorwerpe se posisie in die ruimte te bepaal. 'n Meer komplekse vorm van ruimtelike bewustheid is ʼn kind wat na ʼn opening kyk en dan ʼn skatting maak of sy liggaam deur die opening sal pas.

Bronne

• Coetzee, C. 2003. Motoriese ontwikkeling en selfkonsep by laerskoolseuns: ʼn intervensiestudie. Meestersgraadverhandeling: Stellenbosch Universiteit
• http://www.kleuters.co.za/index.php?destination=perseptuele%20vaardighede, soos op 5 Junie 2019 besigtig
• https://www.netwerk24.com/huisgenoot/Promosies/drie-aktiwiteite-wat-ruimtelike-bewustheid-by-jou-voorskoolse-kind-sal-bevorder-20171215, soos op 5 Junie 2019 besigtig