Ryskoker

'n Ryskoker is 'n elektriese kombuistoestel vir huishoudelike gebruik waarin rys op 'n gerieflike manier gaargemaak en perfek gekry kan word sonder dat dit oorkook of klewerig word. Gespoelde rys en die benodigde hoeveelheid koue water word in 'n metaalhouer gegooi en die ryskoker ingeskakel. Die rys het klaar gekook sodra die hele kookwater geabsorbeer is of verdamp het.

Die meeste elektriese ryskokers bestaan uit 'n buitehouer met 'n termostaat en metaal-kookplaat as verwarmingselement, 'n metaalhouer wat daaropgesit word en 'n bykomende plastiek- of metaalhouer waarin groente, vis of vleis gestoom kan word. Sodra die water in die ryspot verdamp het, word die kookproses outomaties beëindig en die rys warmgehou totdat dit bedien word.

Die eerste outomatiese ryskokers is in die vroeë 1950's deur die Japannese Toshiba Corporation ontwikkel en vanaf 1955 bemark. Vandag word outomatiese ryskokers in baie huishoudings in Oos-, Suid- en Suidoos-Asië aangetref en raak ook in westerse lande toenemend gewild.