SUNSAT

SUNSAT is die eerste satelliet ontwerp en vervaardig in Suid-Afrika. Meer as ‘n honderd senior studente in die elektriese en elektroniese ingenieurswese aan die Universiteit van Stellenbosch was vir 10 jaar vanaf 1992 by die projek betrokke.

Lansering

Met die elfde lanseerpoging is die satelliet op 23 Februarie 1999 vanaf die Vandenberg-lugmagbasis in die VSA met ‘n Delta II-vuurpyl in ‘n baan om die aarde geplaas.

Spesifikasies

Die afmetings van die mikrosatelliet was slegs 45X45X60cm met ‘n massa van 64kg. Sy lewensduur het afgehang van die batterye en is op ‘n 4 tot 5 jaar geskat. In elke 100 minute het dit een maal om die aarde gewentel.

Vrag

NASA-apparatuur
’n hoë-resolusie kamera
skoolprojekte
’n herhalerstasie van radio-amateurs

Suksesse

Suid-Afrika het deur die gepaardgaande navorsing vaardighede verwerf in die ontwikkeling van die jongste tegnologie.
SUNSAT het deur die kamera aan boord puik beelde van die aarde na die beheerstasie op Stellenbsosch gestuur en daardeur bewys dat mikrosatelliete so ‘n gevorderde taak suskesvol kan onderneem.
Internasionale radio-kommunikasie het by die projek gebaat deurdat radio-amateurs in Suid-Afrika en die VSA ‘n herhalerstasie aan boord van die satelliet kon gebruik.
NASA het deur hierdie projek sekere ruimtewetenskaplike navorsing onderneem.
Meer as 50 000 skoolkinders is by die projekte van SUNSAT betrek. Dit het gelei tot wetenskaplike bewuswording.
SunSpace, ‘n maatskappy van die Universiteit van Stellenbosch, is tot stand gebring om SUNSAT-tegnologie verder te ontwikkel en op die mark te bring.

Omdat die apparatuur meegegee het, was die laaste kontak met SUNSAT op 19 Januarie 2001. Op daardie tydstip was alle doelstellings met die projek egter reeds verwesenlik.

Naam

SUNSAT ontleen sy naam aan die afkorting van die Universiteit van Stellenbosch, naamlik SUN en die eerste letters van die woord satelliet.

Bibliografie

earth.esa.int/web/eoportal/satellite-missions/s/sunsat
research.ee.sun.ac.za/sunsat
Schoonwinkel. A., e.a.: SUNSAT – Suid-Afrika se eerste satelliet in die ruimte. Suid-Afrikaanse Tydskrif vir Natuurwetenskap en Tegnologie 21, no. 3, 2002. ISSN 0254-3486 (op internet)
spaceteq.co.za/sunsat