Sadeness (Part I)

Sadeness (Part I) is die eerste enkelsnit van die groep Enigma uit 1990. Die snit was die eerste van vier enkelsnitte afkomstig van die album MCMXC a.D.. Die snit word meteens die suksesvolste treffer van die groep. In vier-en-twintig lande behaal dit die no.1-ranglys, waaronder Suid-Afrika.

Sadeness gaan oor die seksuele verlange van Markies de Sade, vandaar die naam Sadeness, as woordspeling van die Engelse woord sadness. Na Sadeness kom Mea Culpa (Part II), 'n soort opvolg, al was hierdie snit minder gewild as Sadeness self.

Musiekvideo

In die musiekvideo is 'n geleerde te sien, miskien 'n verwysing na die markies, wat aan die slaap val in sy kamer terwyl hy skryf. Dan het hy 'n fantastiese, verligtende droom; hy loop deur 'n ruïne van 'n katedraal en kom daarna by 'n deur, waarskynlik die "verbode deur", as daar na die albumkonsep gekyk word. Agter die deur staan 'n mooi jong vrou, wat die liriek van die musiek na hom fluister: Sade, dis-moi. Sade, donne-moi. (vertaal: Sade, vertel my. Sade, gee my). Die man draai dan om en wil vlug, maar deur sy verlange word hy deur die deur teruggesuig. Op daardie oomblik word die man wakker, waarna die lied eindig.