Tydens die eerste Britse besetting van die Kaap die Goeie Hoop het die H.M.S. Sceptre op 5 November 1799 met 'n noordwester storm in Tafelbaai vergaan. Weens die groot aantal verminkte lyke is dit een van die ergste skeepsrampe in Suider-Afrika.

Uitleg van die H.M.S. Sceptre.

Hierdie Britse oorlogskip met 64 kanonne is in 1781 aan die mond van die Teemsrivier gebou. Die tonnemaat van 1398 maak dit 'n groot skip vir die tyd.

Vroeg in November lê die Sceptre en 14 ander skepe voor anker in Tafelbaai. Die Sceptre was swak onderhou en sy romp was al deels verrot. Op Vrydag 5 November steek 'n besonder kwaai en onverwagte noordwester storm op. Die see het al hoe ontstuimiger geword. Met die gevolg dat al die Sceptre se ankerkabels breek. Boonop ontstaan 'n brand in die buskruitmagasyn, maar 'n hoë brander blus die vuur betyds en voorkom dat die skip ontplof. Geen hulp het van die strand af gekom nie. Baie van die bemanning spring oor boord waar hulle deur die baie wrakstukke van die vrot skip en die rotsrif vermink word. Die wind dryf die wrakstukke van die skip op die Sceptre-rif voor die Woodstock-strand regoor Fort Knokke (vandag die opgevulde terrein van die Royal Cape-jagklub).

Ongeveer 360 man het in die ramp omgekom insluitende kapt. Valentine Edwards. Slegs 'n 50 seelui het die ramp oorleef, maar hiervan het later nog 9 aan hul wonde beswyk. Verskeie van die ander skepe in die baai het ook gestrand, maar sonder enige lewensverlies.

Bibliografie wysig

  • Burman, Jose: Strange shipwrecks of the southern seas. Kaapstad: Struik,1968.
  • Burman, Jose: The bay of storms – Table Bay 1503-1860. Kaapstad: Human & Rousseau,1976. ISBN 0-7981-0670-0
  • Green, Lawrence G.: The coast of treasure. Kaapstad: Howard Timmins, 1983. ISBN 0-86978-048-4
  • Potgieter, Coenraad: Skipbreuke aan ons kus. Kaapstad: Tafelberg, 1969.