Singapura
Die Singapura is ’n kortharige katras met groot oë en ore, ’n pels met ’n strepiespatroon en ’n korterige, stomp stert.
| Singapura | ||||
| ||||
| Alternatiewe naam | Kucinta | |||
| Herkoms | Moontlik Singapoer | |||
| Ontstaan | Natuurlik | |||
| Soort lyf | Klein, stewig | |||
| Pels | Kort | |||
| Patroon | Strepies | |||
| Wetenskaplike naam | ||||
| Felis catus (huiskat) | ||||
| ||||
Geskiedenis wysig
In 1975 het Tommy en Hal Meadow na die VSA teruggekeer van Singapoer af nadat hulle daar gewerk het. Hulle het drie "plaaslike katte met ’n strepiespatroon" saam met hulle teruggebring.[1] Hulle het met die katte begin teel en hulle Singapura genoem – die tradisionele naam vir Singapoer. In 1981 het ’n ander teler Singapoer besoek en daar afgekom op nog ’n kat wat aan die beskrywing van die Singapura voldoen, buiten die stert. Die kat is na die VSA ingevoer en het deel van die teelprogram geword.[1]
Die katte is in 1982 deur die Cat Fanciers' Association (CFA) in Amerika erken en het in 1988 kampioenskapstatus gekry.
Omstredenheid wysig
Die Amerikaanse teler Jerry Mayes het Singapoer in 1987 besoek en daar op dokumente afgekom wat daarop dui dat die drie katte wat die basis vir die Singapura vorm, in werklikheid in 1974 van Amerika na Singapoer gebring is. Pogings om dié fout in die kat se geskiedenis reg te stel was onsuksesvol, tot in 1990, toe die Singapoer-toerismeraad met ’n veldtog begin het om die Singapura as ’n nasionale gelukbringer te gebruik. Die verslaggewer Sandra Davie is oor die teenstrydigheid ingelig en sy het ’n artikel daaroor in die The Straits Times gepubliseer.[2]
Omdat die katte op die invoerdokumente as Abessiniese katte aangedui is[3] en die Meadows met dié katte asook Birmaanse en Siamese katte geteel het,[1] het sommige mense beweer dat die Singapura ’n kruis tussen ’n Abessiniese en Birmaanse kat is.
Die CFA het die voorval ondersoek op versoek van ’n Singapura-telersklub. Hal Meadow het die ondersoekraad meegedeel dat die drie katte kleinkinders was van vier plaaslike katte wat hy in 1971 tydens ’n vroeëre sensitiewe besoek aan Singapoer na die VSA gestuur het.[1] Die Meadows het oënskynlik gejok oor die katte om die sensitiewe besoek geheim te hou.[4] Die CFA kon geen onraad bespeur nie en het besluit om die Singapura se status as ’n natuurlike ras te behou. Joan Miller van die CFA het gesê daar was minstens een kat van Singapoer in die kat se teelbasis – die een wat in 1981 na die VSA uitgevoer is."[1]
Onlangse studies in 2007 oor katte se DNS het gewys daar is min genetiese verskille tussen die Singapura en die Birmaanse kat[5] en dit het die vermoede versterk dat die Singapura nie ’n natuurlike ras is nie.
Beskrywing wysig
Die Singapura is een van die kleinste katrasse. Dit het groot oë en ore en ’n pels met ’n strepiespatroon. Dit is ’n redelik stewige en sterk kat met baie kort en sagte hare. Die stert is dun, effens korter as die lyf en eindig in ’n stomp punt.[6][7] Net een kleur, sepia, word aanvaar en word beskryf as "donkerbruin strepies op ’n warm ivoorkleurige agtergrond".[6][7]
Die Singapura is aktief, nuuskierig en spelerig.[7] Hulle is liefdevol en hou van interaksie met mense.
Sien ook wysig
Verwysings wysig
- ↑ 1,0 1,1 1,2 1,3 1,4 Cathie McHenry, Teelartikel Geargiveer 1 Desember 2010 op Wayback Machine Cat Fanciers' Association. URL besoek op 21 Oktober 2008.
- ↑ Phil Maggitti, The Singapura Geargiveer 8 Desember 2008 op Wayback Machine. Cats and Kittens Magazine. Pet Publishing Inc. URL besoek op 21 Oktober 2008.
- ↑ Tommy Meadow Teelgeskiedenis thesingapuracat.50megs.com. URL besoek op 21 Oktober 2008.
- ↑ Annalisa Dass, Singapura Cat Geargiveer 10 Desember 2008 op Wayback Machine Singapore Infopedia, National Library Board. URL besoek op 21 Oktober 2008.
- ↑ Rob Stein, Using DNA to track the origins of cats: Study confirms they were domesticated in Fertile Crescent Washington Post, 23 Maart 2008. URL besoek op 21 Oktober 2008.
- ↑ 6,0 6,1 Breed Standard: Singapura Geargiveer 3 Maart 2008 op Wayback Machine Cat Fanciers' Association. URL besoek op 21 Oktober 2008.
- ↑ 7,0 7,1 7,2 Singapura breed profile Geargiveer 27 Mei 2012 op Wayback Machine Cat Fanciers' Association. URL besoek op 21 Oktober 2008.
Eksterne skakels wysig
- Suider-Afrikaanse standaarde Geargiveer 7 Mei 2013 op Wayback Machine
- Geskiedenis soos vertel deur die oorspronklike Singapura-invoerder, Tommy Meadow
- CFA-teelprofiel Geargiveer 27 Mei 2012 op Wayback Machine
- The Singapura Geargiveer 8 Desember 2008 op Wayback Machine deur Phil Magitti. Cats and Kittens Magazine
- Singapura-katklub
Wikimedia Commons het meer media in die kategorie Singapura.
Hierdie artikel is vertaal uit die Engelse Wikipedia
