Siriese Dinastie
Die Siriese of Isauriese Dinastie is ’n familie wat van 711 tot 802 oor die Bisantynse Ryk regeer het. Die Isauriese keisers het die ryk suksesvol teen die Moslemse kalifaat verdedig, maar het minder sukses in Europa behaal, waar hulle nederlae gely het teen die Bulgare en die Eksargaat van Ravenna, en invloed verloor het in Italië.
| Siriese Dinastie | |
|---|---|
 ’n Muntstuk wat Leo IV en sy seun Konstantyn VI uitbeeld, met sy oupa Leo III en pa Konstantyn V op die keersy.
| |
| Tydperk | 711 tot 802 n.C. |
| Keisers | Leo III Konstantyn V Artabasdos Leo IV Konstantyn VI Irene van Athene |
| Ryk | Bisantynse Ryk |
| Voorganger | 20 jaar van anargie |
| Opvolger | Dinastie van Nikephoros |
Die eerste keiser van die Siriese Dinastie was Leo III die Isauriër. Hy was ’n generaal wat ’n rebellie gelei en in 717 die troon oorgeneem het. Hy het ’n einde gebring aan die 20 jaar van anargie, die ryk suksesvol teen die invallende Omajjadiese Kalifaat verdedig en die administrasie, wat ná 20 jaar van anargie in ’n chaos was, reggeruk.
Leo is in Junie 741 aan watersug dood en is opgevolg deur sy seun, Konstantyn V. Hy is op 14 September 775 dood en is opgevolg deur sy seun, Leo IV die Kasaar.
Op 24 April 776 het Leo sy seun, Konstantyn VI, as medekeiser gekroon. Dit het gelei tot ’n opstand deur sy vyf halfbroers, wat die troon vir hulself wou hê. Die opstand is egter gou onderdruk. Toe Leo op 8 September 780 dood is, het Konstantyn VI hom opgevolg toe hy nege jaar oud was. Omdat hy minderjarig was, het hy saam met sy ma, Irene, regeer.
Toe Konstantyn 16 word, het sy ma steeds die mag oor hom behou. Nadat ’n opstand teen haar in die lente van 790 onderdruk is, het sy probeer om amptelike erkenning as keiserin te kry. Dit het geboemerang en Konstantyn het in 790 met militêre steun aan die bewind gekom.
Op 19 April 797 is Konstantyn deur ondersteuners van sy ma gevange geneem en sy oë is uitgesteek, en Irene is as eerste heersende keiserin gekroon. Sy het vyf jaar lank regeer, van 797 tot 802.
In 802 het die parisiërs teen haar saamgesweer en Nikephoros I, die minister van finansies, op die troon geplaas. Irene is na Lesbos verban, waar sy die volgende jaar dood is, en so het die Siriese Dinastie tot ’n einde gekom.