Slimmerd (sagteware)

'n Slimmerd of assistent (Engels: wizard of assistant) is 'n interaktiewe rekenaarprogram wat die gebruiker help met die uitvoer van moeilike take, soos die installering van sagteware. Die gebruiker word stap vir stap gehelp met die stel van voorkeure en word voortdurend op hoogte gehou van vordering, byvoorbeeld watter persentasie van die taak reeds voltooi is. 'n Webwerf wat mense help om 'n vliegtuigkaartjie aanlyn te bespreek is 'n voorbeeld van 'n slimmerd.

Oorsprong en vertaling van die woord

Die Engelse woord "wizard" is aanvanklik deur Microsoft in hulle Windows-bedryfstelsel bekendgestel, alhoewel "assistant" ook algemeen in programme gebruik word.

Die Nederlanders het die woord "wizard" onvertaald in hulle taal opgeneem terwyl die Duitsers die woord na "assistent" vertaal.

Hoewel die woord nie amptelik in Afrikaanse woordeboeke voorkom nie, word "wizard" algemeen as 'n "slimmerd", "assistent", "hulpprogram" of "ghoeroe" (byvoorbeeld installasieghoeroe) vertaal. Slimmerd is natuurlik 'n Afrikaanse (en Nederlandse) woord wat volgens die HAT gedefinieer word as:

'n Slim, skrander, vindingryke persoon; ook, uitgeslape, geslepe persoon: 'n Politieke slimmerd. Pasop vir sulke slimmerds.