Deepwater Horizon-oliestorting
Die Deepwater Horizon-oliestorting is 'n katastrofiese oliestorting in die Golf van Meksiko en word as die grootste oliestorting in die VSA se geskiedenis beskou.[1] Die olie kom uit die seebodem uit 'n boorgat wat oopgebreek het na 'n ontploffing op die Deepwater Horizon olieboorplatform op 20 April 2010. Die ontploffing het die dood van 11 werkers op die platform veroorsaak en 'n verdere 17 werkers is beseer. 98 Mense het die ongeluk oorleef sonder enige ernstige beserings.[2]
Die olielek is sowat 1500 meter onder die seevlak. Beramings van die hoeveelheid olie wat gestort word wissel van BP se huidige beraming van 5000 vate per dag tot soveel as 100 000 vate ru-olie per dag. Die presiese vloeitempo is onseker – deels omdat BP geweier het om onafhanklike wetenskaplikes toe te laat om akkurate metings te neem – en is steeds 'n omstrede besprekingspunt.[3] Die oliekol op die oppervlak beslaan 'n gebied van 6500 vierkante kilometer met die omvang daarvan wat daagliks wissel afhangende van die weerstoestande.[4] Wetenskaplikes het ook enorme onderwater oliepluime ontdek wat nie vanaf die oppervlak sigbaar is nie.
BP (voorheen British Petroleum) is die operateur en hoofontwikkelaar van die Macondo Prospect olieveld, wat na raming sowat 50 miljoen vate ru-olie bevat.[5] BP met 'n 65% aandeel is die hoof aandeelhouer. Anadarko Petroleum Corporation en 'n filiaal van Mitsui is ook noemenswaardige aandeelhouers. BP het die Deepwater Horizon boorplatform gehuur van die maatskappy Transocean.[6]
Die V.S.A regering het BP as die verantwoordelike party vir die insident uitgewys en amptenare het aangedui dat hulle die maatskappy verantwoordelik gaan hou vir al die skoonmaakkostes wat spruit uit die oliestorting.[7][8] BP het verantwoordelikheid aanvaar vir die oliestorting en skoonmaakkostes maar het aangedui dat hulle nie blaam dra vir die ongeluk nie aangesien die platform deur Transocean personeel bedryf is.[9] Hierdie insident is die derde ernstige ongeluk by 'n BP-bestuurde aanleg in die V.S.A die afgelope vyf jaar. Dit volg op die Texas City Raffinadery-ontploffing in 2005 en die Prudhoe Bay-oliestorting in 2006. Hierdie vorige insidente is toegeskryf aan swak veiligheids- en bestuursmaatreëls en het daartoe bygedra dat BP se aansien en markwaarde aansienlike skade gely het.[10][11]
Op 12 Julie 2010 het 'n onderwaterrobot 'n nuwe kap oor die lekkende oliebron geplaas. Die kap se kleppe is oor 'n paar dae gesluit, die laaste op Donderdag, 15 Julie. In die eerste 48 uur na die sluiting blyk dit asof geen olie meer uit die bron (of elders) ontsnap nie.
Verwysings wysig
| Wikimedia Commons bevat media in verband met Deepwater Horizon oil spill. |
- ↑ Jervis, Rick; Levin, Alan (27 Mei 2010). "Gulf oil spill now largest in U.S. history as BP continues plug effort" (in Engels). USA Today. Geargiveer vanaf die oorspronklike op 18 Julie 2012. Besoek op 27 Mei 2010.
- ↑ "USA Today, Memorial Services Honors 11 Dead Oil Rig Workers". 25 Mei 2010. Besoek op 26 Mei 2010.
- ↑ Gillis, Justin (18 Mei 2010). "Giant Plumes of Oil Forming Under the Gulf". The New York Times (in Engels). Geargiveer vanaf die oorspronklike op 8 Maart 2020. Besoek op 18 Mei 2010.
- ↑ "Progress toward Gulf oil well cap". Reuters. 3 Mei 2010. Besoek op 13 Mei 2010.
- ↑ Klump, Edward (13 Mei 2010). "Spill May Hit Anadarko Hardest as BP's Silent Partner". Bloomberg. Besoek op 19 Mei 2010.
- ↑ Reddall, Braden (22 April 2010). "Transocean rig loss's financial impact mulled". Reuters (in Engels). Geargiveer vanaf die oorspronklike op 20 Januarie 2011. Besoek op 1 Mei 2010.
- ↑ "Salazar: Oil spill 'massive' and a potential catastrophe". CNN (in Engels). 2 Mei 2010. Geargiveer vanaf die oorspronklike op 9 Oktober 2019. Besoek op 1 Mei 2010.
- ↑ "Guard mobilized, BP will foot bill". Politico (in Engels). Capitol News Company LLC. 1 Mei 2010. Geargiveer vanaf die oorspronklike op 13 September 2018. Besoek op 1 Mei 2010.
- ↑ "Fire booms neglected in oil cleanup?". MSNBC (in Engels). 3 Mei 2010. Geargiveer vanaf die oorspronklike op 4 November 2011. Besoek op 3 Mei 2010.
- ↑ Krauss, Clifford (29 April 2010). "Oil Spill's Blow to BP's Image May Eclipse Costs". The New York Times (in Engels). New York. Geargiveer vanaf die oorspronklike op 15 Maart 2020. Besoek op 26 Mei 2010.
- ↑ "Previous BP Accidents Blamed On Safety Lapses". Wade Goodwyn. All Things Considered (National Public Radio). 2010-05-06. http://www.npr.org/templates/story/story.php?storyId=126564739. 5:06 minutes in.