Staatsverjaardag

Die Staatsverjaardag op 23 Februarie was ‘n openbare vakansiedag in die Republiek van die Oranje-Vrijstaat.

Hierdie dag herdenk die stigtingsdag van die republiek met die ondertekening van die Bloemfontein-konvensie op 23 Februarie 1854.

Elke jaar op hierdie datum was daar ‘n groot byeenkoms in die meeste gemeenskappe om die verjaardag van die land te vier. Mense het van ver van hul plase gekom om een dag per jaar vrolik en gesellig saam te wees. Dit was meesal ‘n groot saamtrek van oud en jonk onder koeltebome en seile wat gespan is. Kenmerke van die feesvierings was ‘n Boeredag, Boeresport, ‘n Wapenskou en perderesies.

Mans was veral bedrywig op die skietbaan en patrone is gratis beskikbaar gestel. Daar is van 300 tot 400 tree uit die vuis geskiet. By die Wapenskou het die plaaslike kommando ‘n vertoning van hul slaankrag gegee in moontlike landsverdediging. By die Boeresport is kalf gery en hoenderhane en varke gevang. Jukskei is gespeel volgens die skyfskietreëls. Hamels, verse, sakke hawer, sakke mielies en ammunisie is as pryse uitgeloof.

Bibliografie

• Die lewe in ou Suider-Afrika. Johannesburg: Suid-Afrikaanse Uitsaaikorporasie, 1966