Die Sterrenag

een van die bekendste skilderye deur die Nederlandse post-Impressionistiese kunstenaar Vincent van Gogh
(Aangestuur vanaf Sterrenag)
Sterrenag
Vincent van Gogh, 1889
Olie op doek, 73 × 92 cm
Museum of Modern Art

Die Sterrenag is een van die bekendste skilderye deur die Nederlandse post-Impressionistiese kunstenaar Vincent van Gogh en maak deel uit van die permanente versameling van die Museum of Modern Art in New York Stad. Die olieskildery op doek is 73 x 92 cm groot.

Die skildery, wat in Junie 1889 deur Van Gogh geskep is tydens sy verblyf in 'n geestesieke-inrigting by Saint Rémy de Provence, beeld 'n malende hemellandskap uit, gevul met gloeiende geel sterre bokant 'n klein dorpie en golwende heuwels. Dit is slegs 13 maande voor Van Gogh se selfmoord geskilder.

Die donker vorm op die voorgrond links van die middel is al as die punt van 'n boom beskryf, alhoewel kunshistorici met verskeie ander vertolkings vorendag gekom het. Die doel daarvan blyk te wees om mens se oog na die hemel te rig. Verder voeg dit diepte tot die skildery toe. 'n Kerktoring op die dorp wys ook na die lug, wat weereens daartoe lei dat die waarnemer se blik na bo gerig word.

Die kunswerk word beskou as een van die groot meesterstukke van alle tye, aangesien dit tegelykertyd beeldskoon en ontrustend is. Van Gogh se woorde "Net soos ons die trein haal om by Tarascon of Rouen uit te kom, haal ons die dood om 'n ster te bereik", word dikwels met die skildery in verband gebring.

Die skildery was die inspirasie vir Don McLean se liedjie Vincent, wat ook aan die openingswoorde Starry, Starry Night bekend is, en vir die Franse komponis Henri Dutilleux se orkestrale werk. Timbres, Espace, Mouvement

V838 Monocerotis, wat benoem is as een van die mees misterieuse sterre in die Melkweg, toon volgens sterrekundiges van die Hubble-ruimteteleskoop ooreenkomste met Die Sterrenag.

Eksterne skakels wysig