Voëlverskrikker

'n Voëlverskrikker of strooipop is 'n voorwerp waarmee voëls verdryf word. Kraaie en ander klein tot middelgroot voëls is dikwels ongenooide gaste op lande, wat groot skade aan vrugte aanrig en sade opvreet voordat dit ontkiem. Voëls is ook 'n gevaar naby lughawens, wat noodlottige ongelukke kan veroorsaak as hulle nie verdryf word nie. Soms is hulle sommer 'n steurnis as gevolg van die lawaai wat hulle opskop.

Voëlverskrikkers op 'n rysveld in Japan.

Oorspronklik is poppe algemeen as voëlverskrikkers ingespan, gewoonlik met uitgespreide arms en met strooi opgestop, om dit soos mense te laat lyk. Daar is egter ook ander metodes, soos die ophang van reflektiewe stroke aluminium in vrugtebome.

Party soorte voëlverskrikkers werk net tydelik. Sodra die voëls agterkom dat hul geen gevaar inhou nie, sal hulle selfs neste daarin bou.

Ander metodes is die ophang van dooie kraaie en die speel van angskrete (die geluid waarmee voëls mekaar waarsku) deur luidsprekers. Sulke metodes is effektief en werk permanent.

Fotogalery

• 
  Voëlverskrikkers op 'n plaas in die Wes-Kaap.
• 
  'n Koreaanse voëlverskrikker.
• 
  'n Japannese voëlverskrikker met 'n helm op.
• 
  'n Amerikaanse voëlverskrikker

Eksterne skakels

• Wikimedia Commons het meer media in die kategorie Voëlverskrikker.