Die Sudd (Arabies: as-Sudd of al-Sudd) is 'n groot moeras in Suid-Soedan net noord van die hoofstad Joeba wat deur die Wit Nyl se Baḥr al-Jabal-gedeelte gevorm word. Die Arabiese woord sudd is afgelei van sadd (سد) en beteken "versperring"[1] of "belemmering".[2] Die term "die sudd" verwys nou na enige groot soliede swaaiplantegroei-eiland of mat. Die gebied wat die moeras bedek, is een van die wêreld se grootste vleilande en die grootste varswater-vleiland in die hele Nylrivierbekken.[3][4] Daarbenewens is dit die grootste binnedelta in Afrika.[5]

Vissers in die Sudd, Suid-Soedan
Nasa-Satellietbeeld van die Sudd
Die Sudd se ligging in Suid-Soedan

Oor baie jare heen het die moeras, en veral sy plantegroei, 'n ondeurdringbare versperring vir die navigasie langs die Nylrivier gevorm. In 61 n.C. het 'n troep Romeinse soldate, wat deur keiser Nero ontplooi is, die Wit Nyl verken, maar hulle was nie in staat om die Sudd oor te steek nie, wat sedertdien die grens van Romeinse indringing in Ekwatoriaal-Afrika gemerk het.[6] Om dieselfde redes was die soektog na die Nylrivier se bron in latere tye besonders moeilik; dit het uiteindelik oorlandse ekspedisies van die sentrale Afrikakus geraak, wat wou vermy om deur die Sudd te moes reis.

Die Sudd streek oor sowat 390 km in 'n noord-suidelike rigting en 240 km in 'n oos-westelike rigting. Dit beslaan 'n oppervlakte van sowat 30 000 km², wat tydens reëntyd tot 130 000 km² sal kan groei.[4]

Verwysings wysig

  1. (en) Gaudet, J.J., en A. Falconer, 1983. Remote sensing for tropical freshwater bodies. The problem of floating islands on Lake Naivasha. Regional Remote Sensing Facility, Nairobi, Kenya. 4p.
  2. (en) The New Oxford American Dictionary (NOAD), 3de uitgawe.
  3. "Südsudan" (in Duits). Auswärtiges Amt. Augustus 2017. Geargiveer vanaf die oorspronklike op 25 Maart 2019. Besoek op 11 Augustus 2019.
  4. 4,0 4,1 "The Impenetrable Wetlands of Sudd in South Sudan" (in Engels). Amusing Planet. 2017. Geargiveer vanaf die oorspronklike op 29 April 2020. Besoek op 11 Augustus 2019.
  5. (en) T.S. McCarthy, 1993. The great inland deltas of Africa, Journal of African Earth Sciences, vol. 17, nr. 3, bl. 275–291
  6. (en) L.P. Kirwan, "Rome beyond The Southern Egyptian Frontier", Geographical Journal, 123 (1957), bl. 16f., besoek op 11 Augustus 2019.

Eksterne skakels wysig