Suid-Afrikaanse Buro vir Standaarde

Die Suid-Afrikaanse Buro vir Standaarde of SABS is 'n statutêre liggaam wat gestig is kragtens die Standaardewet, Wet No. 24 van 1945, en funksioneer kragtens die nuutste weergawe van die Standaardewet, Wet No. 29 van 1993 as nasionale instituut vir die bevordering en handhawing van standardisasie en kwaliteit van goedere en die lewering van dienste.

SABS is ook die liggaam wat Suid-Afrika by die Internasionale Standaarde Organisasie (ISO) verteenwoordig.

Funksies van die SABS

Die SABS is werksaam op die volgende gebiede:

Die SABS publiseer nasionale standaarde wat voorberei word deur konsensus in tegniese komitees en verskaf inligting oor nasionale standaarde van alle lande asook internasionale standaarde.
Die SABS toets en sertifiseer produkte en dienste om voldoening aan standaarde te bevestig.
Die SABS ontwikkel tegniese regulasies (verpligte spesifikasies) wat op nasionale standaarde gegrond is, monitor en dwing voldoening aan sulke tegniese regulasies af.
Die SABS monitor en dwing wetlike metrologiese wetgewing af.
Die SABS bevorder uitmuntendheid in ontwerp.
Die SABS verskaf opleiding oor aspekte van standaardisasie.

Organisasie

In 'n poging om sy diensverskaffing aan die nywerhede wat dit bedien te maksimeer het die SABS sy aktiwiteite verdeel in sewe nywerheidsektore, wat elk die volle reeks dienste kan lewer wat betrekking het op daardie spesifieke nywerheid. Die sewe sektore is:

Chemikalieë
Elektrotegnies
Voedsel en Gesondheid
Meganies en Materiale
Mynbou en Minerale
Dienste
Vervoer

Doelwitte

Die SABS se doelwitte sluit in:

Die bevordering van volhoubare ontwikkeling
Verbeterde marktoegang en uitvoere en om op te tree as die fasiliteerders en bemagtigers van handel en mededingendheid.
Ondersteuning van nasionale en streeksdoelwitte (SEB, SAOK en NEPAD)
Doeltreffende skakeling met die openbare sektor.
Verhoogde toepaslikheid en erkenning in markte.

Bronne

http://www.sabs.co.za Geargiveer 16 Januarie 2021 op Wayback Machine SABS se webwerf