Surveyor 6

Ruimtetuig en land op die maan

Surveyor 6 was die sesde ruimtetuig van die Amerikaanse onbemande Surveyor-program wat op die oppervlakte van die Maan geland het. Surveyor 6 het op Sinus Medii geland. Altesaam 30 027 foto's is na die Aarde versend.

Hierdie ruimtetuig was die vierde van die Surveyor-reeks wat 'n suksesvolle sagte landing op die Maan gedoen het, televisiefoto's na die landing verkry het, die oorvloed van die chemiese elemente in die maangrond bepaal het, landingsdinamikadata verkry het, termiese en radarreflektiwiteitsdata verkry het en 'n Vernier-enjinerosie-eksperiment uitgevoer het. Surveyor 6 was feitlik identies aan Surveyor 5, hierdie ruimtetuig het 'n televisiekamera, 'n klein staafmagneet (wat aan een voetstuk vasgemaak was) en 'n alfa-verstrooiingsinstrument sowel as die nodige ingenieurstoerusting gedra. Dit het op 10 November 1967 in Sinus Medii geland, 0,49 grade in breedtegraad en 1,40 grade W lengtegraad (selenografiese koördinate) – die middelpunt van die Maan se sigbare halfrond. Die ruimtetuig het alle beplande doelwitte bereik. Die suksesvolle voltooiing van hierdie sending het voldoen aan die Surveyor-program se verpligting teenoor die Apollo-program. Op 24 November 1967 is die ruimtetuig vir die twee weke lange maannag gesluit. Kontak is op 14 Desember 1967 gemaak, maar geen bruikbare data is verkry nie.

Maangrondopnames is met behulp van fotografiese en alfadeeltjie-terugstrooimetodes voltooi. 'n Soortgelyke instrument, die APXS, is aan boord van verskeie Mars-missies gebruik.[1]

In 'n verdere toets van ruimtetegnologie is Surveyor 6 se enjins weer aangeskakel en vir 2,5 sekondes ontbrand om die eerste maan-opstyging op 17 November om 10:32 UTC te toets. Dit het 700 N se stukrag ontwikkel en het die voertuig 4 m van die maanoppervlak opgelig. Nadat dit 2,5 m beweeg het, het die ruimtetuig weer suksesvol sag geland en voortgegaan om te funksioneer soos ontwerp.

Surveyor 6 het naby die impakplek van Surveyor 4, wat 'n paar maande vroeër in Julie 1967 hier neergestort het, geland.

Verwysings wysig

  1. NASA, JPL. "Alpha Particle X-Ray Spectrometer (APXS) – Mars Science Laboratory". mars.nasa.gov. Besoek op 25 November 2016.

Notas wysig

Hierdie artikel is in sy geheel of gedeeltelik vanuit die Engelse Wikipedia vertaal.