System/360
System/360 was 'n familie van hoofraamrekenaars wat op 7 April 1964 deur IBM aangekondig en tussen 1965 en 1978 verkoop is.[1] Dit was die eerste rekenaars wat geskik was om die volledige spektrum van toepassings te loop, van klein tot groot, en kon vir beide administratiewe en wetenskaplike toepassings gebruik word. Die ontwerp het duidelik tussen die argitektuur en implementering onderskei. Dit het IBM toegelaat om 'n suite van versoenbare ontwerpe teen verskillende pryse beskikbaar te stel. Almal, met die uitsondering van die onversoenbare model-44 en die duurste stelsels, het mikrokode gebruik om die instruksiestel te implementeer. Die instruksiestel het 8-bis adressering gebruik en kon binêre, desimale en swaaipunt- ("floating-point") berekeninge doen.
Die stadigste modelle wat in 1964 aangekondig is, het teen 'n spoed van tussen 0.0018 en 0.034 MIPS geloop;[2] die vinnigste modelle was ongeveer 50 keer vinniger[3] met 8 KG en tot 8 MG interne geheue,[3] hoewel die latere ongewoon was, en met tot 8 megagrepe se skyfspasie ("Large Capacity Storage"). 'n Groot stelsel kon so min as 256 KG se hoofgeheue gehad het, maar 512 KG, 768 KG of 1024 KG was meer algemeen.
System/360 was uiters suksesvol in die mark. Kliënte kon 'n kleiner stelsel koop met die wete dat hulle, indien nodig, altyd na 'n groter stelsel toe kan migreer sonder om hulle toepassings en randapparatuur te vervang. Die ontwerp is as een van die suksesvolste in die geskiedenis beskou, en het 'n groot invloed op die ontwerp van toekomstige rekenaars gehad.
Die hoofontwerper van System/360 was Gene Amdahl en die projek is deur Fred Brooks bestuur. Hulle het aan die voorsitter, Thomas J. Watson Jr, gerapporteer.[3] Die kommersiële vrystelling is deur een van Watson se ander werknemers, John R. Opel, hanteer, wat die bekendstelling van IBM se familie van System 360-hooframe in 1964 bestuur het.[4]
Toepassings wat op die System/360 kon loop kan tot vandag op IBM se nuutste System Z stelsels geloop word (terugwaarts versoenbaar).
Verwysings
wysig- ↑ (en) IBM System/360 Dates and Characteristics
- ↑ System 360/30 se bekendstelling
- ↑ 3,0 3,1 3,2 (en) "System/360 se bekendstelling" (persverklaring), IBM Data Processing Division, 7 April 1964: IBM-PR360
- ↑ (en) An Appreciation – John R. Opel, op www.ibm.com
Eksterne skakels
wysig
Wikimedia Commons het meer media in die kategorie System/360.
