Tabi
Tabi ((ja) 足袋 足袋) is tradisionele Japannese sokkies. Hulle kom tot die enkels van die draer, en het 'n splitsing tussen die groottoon en die ander tone, sodat hulle gedra kan word in kombinasie met zori, geta en ander Japannese skoeisel. Tabi word deur sowel mans as vroue gedra.
Tabi word dikwels gekombineer met kimono’s en ander tradisionele Japannese klere. Tabi is gewoonlik wit van kleur. Dié word gedra vir formele geleenthede soos by 'n teeseremonie. Verder bestaan daar ook swart en blou tabi. Dié word deur mans gedra tydens byvoorbeeld 'n reis. Vir vroue bestaan daar ook gekleurde tabi en tabi met patrone.
Tabi word in teenstelling met gewone sokkies nie voorsien van 'n elastiese deel wat sorg dat hulle styf sit nie. In plaas daarvan word hulle aan die agterkant vasgemaak soos 'n skoen.
'n Variant van die tabi is die jika-tabi ((ja) 地下足袋), wat veral gedra word deur bouers, boere en tuinwerkers. Dié word gemaak van swaarder en stewiger materiaal, en is bedoel om gedra te word sonder ander skoeisel.
| Hierdie artikel is in sy geheel of gedeeltelik vanuit die Nederlandse Wikipedia vertaal. |
