Telwoord

Die telwoorde is 'n woordsoort wat betrekking het op getalle.

Soorte telwoorde

Telwoorde word onderverdeel in hooftelwoorde en rangtelwoorde:

Hooftelwoorde

Hooftelwoorde dui die hoeveelheid of aantal aan. Dit word in bepaalde en onbepaalde hooftelwoorde verdeel:

Bepaalde hooftelwoorde sê presies hoeveel daar is, bv.

• een, drie, honderd, ens.

Voorbeelde:

• Daar is vier lemoene aan die boom.
• Daar is twintig appels aan die boom.

Onbepaalde hooftelwoorde dui nie presies die aantal aan nie, bv.

• baie, heelwat, weinig, min, verskeie, ens.

Voorbeelde:

• Daar is baie lemoene aan die boom.
• Daar is heelwat appels aan die boom.

Rangtelwoord

Rangtelwoord dui 'n volgorde aan. Dit word in bepaalde en onbepaalde rangtelwoorde verdeel:

Bepaalde rangtelwoord dui die presiese volgorde of plek aan, bv.

• eerste (1ste), derde (3de), vyfde (5de), honderdste (100ste), ens.

Voorbeelde:

• Sy is haar ouers se tweede kind.
• Neem die vierde lekker.

Onbepaalde rangtelwoorde dui nie die presiese volgorde of plek aan nie, bv.

• middelste, laaste, soveelste, ens.

Voorbeelde:

• My vriend is die middelste een.
• Dit is die soveelste keer dat hy val.

Eksterne skakels

• Wikiwoordeboek het 'n inskrywing vir telwoord.