The House on Mosfilmovskaya
The House on Mosfilmovskaya
Дом на Мосфильмовской
Verdiepings
51 + 34 (bogronds) +
3 (ondergronds)
Opgerig
2006−2012
Argitekte
Sergey Skuratov Architects[1]
Hoofkontrakteur
Svargo-groep, Moskou[2]
Strukturele ingenieur
Ivan Shipetin
Meganiese en elektriese ingenieurswese en sanitasie
Alexander Kolubkov
Opdraggewer en eienaar
VneshTorgBank
Straatadres
Piriëwastraat 2
Moskou 119285
The House on Mosfilmovskaya (amptelike Engelse benaming; Russies: Дом на Мосфильмовской) is 'n wolkekrabber vir gemengde gebruik, bestaande uit twee torings, wat in Moskou se Mosfilmofskajastraat, naby die befaamde naamgewende Mosfilm-rolprentateljee en die Mossiesheuwels, opgerig is. Met 51 verdiepings (waarvan 46 met woonruimte) en 'n hoogte van 213 meter (Toring A) is dit een van die twintig hoogste geboue in die Russiese Federasie. Opvallende kenmerke is sy sigbetonstutte, die brandwerende Alpolic-aluminium-paneelstelsel van sy fasade met agt kleurskakerings wat uit Japan ingevoer is[3], en die spierwit Carrara-marmervoorkoms van die boonste verdiepings.
Die twee torings van die kompleks word deur twee parallele eenhede met agt verdiepings elk met mekaar verbind, met 'n gemeenskaplike atrium wat op natuurlike sonlig vir beligting steun. Die twee torings rus op drie ondergrondse verdiepings as basis met parkeerruimtes, winkelgeriewe, sportgeriewe en kantooreenhede. Daar is altesaam 556 woonstelle in die twee torings.
In 2010 het die projek opslae gemaak nadat die destydse Moskouse burgemeester Joeri Loezjkof beswaar teen die gebou se hoogte aangeteken en die verwydering van die twee boonste verdiepings geëis het. Volgens amptelike verklarings sou die boupermit geen voorsiening daarvoor gemaak het nie - 'n bewering wat die argitek Sergey Skuratov ontken het. Volgens hom het die twee verdiepings die son weerkaats en Loezjkof op sy gholfbaan belemmer. Hy is per presidensiële dekreet uit sy amp verwyder voordat die saak beslis kon word, en die projekbestuurders het voortgegaan met die boubedrywighede soos beplan.[4]
Verwysings
wysig- ↑ skuratov-arch.ru: Portefeulje - Mosfilmovsky Skyscraper. Besoek op 3 Mei 2020
- ↑ svargogroup.ru: Дом на МосфильмовскойЖилой комплекс. Besoek op 3 Mei 2020
- ↑ Alpolic-panele bestaan uit twee lae aluminium met 'n termoplastiese kern en word vervaardig deur The Kaiteki Company, 'n dogteronderneming van Mitsubishi Chemical. Alpolic is 'n handelsmerk in besit van Kaiteki/Mitsubishi Chemical. Die panele is in die 1970's op die mark ingevoer en word intussen in sowat 130 lande gebruik
- ↑ Wallpaper City Guide Moscow. Hersiene uitgawe. London and New York NY: Phaidon Press 2014, bl. 65