Tinea

Dermatofytose, ook bekend as tinea en ringwurm, is 'n swaminfeksie van die vel (‘n dermatomikose), wat die vel, hare en naels kan beïnvloed. Tipies lei dit tot 'n rooi, jeukerige, skubberige, sirkelvormige uitslag. Haarverlies kan voorkom in die area wat geraak word. Simptome begin vier tot veertien dae na blootstelling. Die tipes dermatofytose word tipies genoem na die area van die liggaam wat hulle beïnvloed. Veelvuldige areas kan op 'n gegewe tydstip geraak word.

Ongeveer 40 soorte swamme kan dermatofytose veroorsaak. Hulle is tipies van die trikofiton-, mikrosporum- of epidermofiton tipe. Risikofaktore sluit in die gebruik van openbare storte, kontaksportsoorte soos stoei, oormatige sweet, kontak met diere, vetsug en swak immuunfunksie. Ringwurm kan van ander diere of tussen mense versprei. Diagnose word dikwels gebaseer op die voorkoms en simptome. Dit kan bevestig word deur óf die kweek of kyk na 'n velmonster onder 'n mikroskoop.

Voorkoming kan geskied deur die vel droog te hou, nie kaalvoet in die openbaar te loop nie en nie persoonlike items te deel nie. Behandeling is tipies met 'n antifungale room soos klotrimasool of mikonasool. As die kopvel betrokke is, mag antifungale middels per mond, soos flukonasool, nodig wees.

Dermatofytose het wêreldwyd versprei, en tot 20% van die wêreld se bevolking kan op enige gegewe tydstip daardeur besmet wees. Infeksies van die lies is meer algemeen by mans, terwyl infeksies van die kopvel en liggaam ewe veel by beide geslagte voorkom. Infeksies van die kopvel is mees algemeen by kinders terwyl infeksies van die lies meestal by bejaardes voorkom. Beskrywings van ringwurm dateer uit die antieke geskiedenis.