Toile

Toile is 'n tekstielstof, na aanleiding van die Franse woord wat "linnedoek" of "skilderdoek" beteken. Die woord "toile" kan na die volgende verwys: die tekstielstof self, 'n proefkledingstuk wat van materiaal aanmekaar gestik is, of 'n soort herhalende oppervlakversiering (tradisioneel) wat op materiaal gedruk is. In die Engelse taal het die term rondom die 12de eeu tot stand gekom.

'n Foto van toile de jouy-materiaal op 'n Franse Rococo-styl stoel

Etimologie

Middel-Engelse toile, van Franse toile ('doek'), van Oud-Franse teile, uit Latynse tela ('web'), van Proto-Indo-Europese * (s) teg ('om te bedek') (sien 'n lys van Proto-Indo-Europese wortels in Wiktionary).

Gebruike

Toetskledingstuk

In Australiese en Britse terminologie is 'n 'toile' 'n weergawe van 'n kledingstuk wat deur 'n mode-ontwerper of kleremaker gemaak is om 'n patroon te toets. Dit word meestal van goedkoop materiaal gemaak, omdat verskeie toiles dikwels tydens die proses om 'n ontwerp te vervolmaak gemaak word. Daar word soms in die Verenigde State na toiles as 'muslins' (moeseliene) verwys, omdat goedkoop, ongebleikte katoenstof, van verskillende gewigte, gebruik word om die toetskledingstukke te maak.

Toile de jouy materiale

Toile de jouy materiaal

Toile de Jouy

"Toile de Jouy", soms afgekort as bloot "toile", is 'n tekstielstof met 'n wit of afwit agtergrond, waarteen daar 'n versieringspatroon met herhalende patrone, wat redelike komplekse tonele uitbeeld, gedruk is. Die patrone word dikwels gekenmerk deur pastorale temas soos 'n paartjie wat 'n piekniek langs 'n meer hou, of 'n rangskikking van blomme. Die patroongedeelte bestaan uit 'n enkele kleur, meestal blou, donkerrooi of swart. Groen, bruin en magenta patrone kom minder gereeld voor, maar dit is nie heeltemal ongewoon nie. Toile word veral met tekstielstowwe (gordyne en stofferingsmateriaal, veral glanssis) geassosieer, maar muurpapier met die toile-patrone wat by die tekstielstowwe pas, is ook baie gewild, en word dikwels gebuik om tradisionele Frans-geïnspireerde dekorstyle te skep. Toile-patrone kan ook op teepotte, beddegoed, klere, ens. gebruik word. In die hoërklas (hoofsaaklik die Amerikaanse, maar ook Noord-Europese) samelewing, word toile dikwels op rokke of voorskote, wat by geleenthede soos tuinpartytjies of teepartytjies gebruik word, gesien.

Toiles is oorspronklik in die middel van die 18de eeu in Ierland geproduseer en het vinnig in Brittanje en Frankryk gewild geword. Die term "Toile de Jouy" het in die laat 18de eeu in Frankryk ontstaan. In die Franse taal beteken die frase letterlik "lap uit Jouy-en-Josas ", 'n dorp in die suid-westelike voorstede van Parys.

Alhoewel dit sedertdien sonder ophou geproduseer is, het dit in die jaar 2000 'n groot toename in gewildheid getoon. Terwyl dit vantevore hoofsaaklike in binneversiering gebruik is, het ontwerpers ook begin om met toile-geïnspireerde kledingstukke te eksperimenteer. Hemde met toile-patrone is egter wel sedert die 1970s algemeen gedra.

Toiles was baie gewild gedurende die Koloniale era in die Verenigde State en word dikwels met bewaringsdorpe en historiese gebiede soos die koloniale Williamsburg, geassosieer. Toe Williamsburg in die dertigerjare 'n herlewing gesien het, het toiles ook opnuut gewild geword. Dit het ook tydens die viering van die Verenigde State se tweehonderdjarige bestaan in 1970, gebeur. Sedertdien het baie ander maatskappye, byvoorbeeld Timorous Beasties, begin om toile in hul ontwerpe te gebruik.

Eksterne skakels

• Wikimedia Commons het meer media in die kategorie Toile.