Treptower Park

Treptower Park is 'n openbare park in Berlyn wat regstreeks aan die Spree-rivier in die stadsdeel Alt-Treptow van die administratiewe distrik Treptow-Köpenick geleë is. Die park beslaan 88,2 hektaar.

'n Grasveld in die Treptower Park

'n Panoramiese uitsig oor die handelskouterrein van 1896

Ontstaansgeskiedenis

Die park is tussen 1876 en 1888 volgens planne van die destydse stedelike tuinbou-direkteur Gustav Meyer aangelê. As voorloper van die park word 'n klein bos naby Treptow beskou wat deur Johann Peter Paul Bouché stelselmatig aangeplant is. Die park se boukoste het 1,2 miljoen mark beloop. Die terrein is as "volkspark" ontwerp en was destyds een van die eerste tuine wat vir die algemene publiek toeganklik was. 'n Uitgestrekte speel- en sportterrein, wat in die vorm van 'n hippodroom met 'n lengte van 250 en 'n wydte van 100 meter aangelê is, het as middelpunt van die park gedien.

Tussen 1 Mei en 15 Oktober 1896 is 'n groot handelskou, die Berliner Gewerbeausstellung, in die Treptower Park gehou. Ter ere van Gustav Meyer het die beeldhouer Albert August Manthe 'n borsbeeld geskep wat in 1890 in die westelike gedeelte van die park tussen die strate Puschkinallee en Am Treptower Park geplaas is.

Die sentrale speel- en sportterrein is deur die Militêre Sowjet-administrasie in Duitsland (SMAD) vir die bou van 'n monument ter ere van gesneuwelde Sowjet-soldate gekies. Die monument met 'n oppervlakte van 93 000 m² het tussen 1946 en 1949 ontstaan. Die monument, wat ook as militêre begraafplaas gedien het, herdenk sowat 80 000 lede van die Rooi Leër wat tydens die verowering van Berlyn in die Tweede Wêreldoorlog geval het.

Tussen 1957 en 1958 is 'n somerblomtuin volgens 'n ontwerp van die landskapsargitek Georg Pniower aangelê - die voorloper van die huidige rosetuin met 25 000 roosplante, skulpture en 'n fontein.

Eksterne skakels

• Wikimedia Commons het meer media in die kategorie Treptower Park.