Troilus and Cressida
Troilus and Cressida, of The Famous Historie of Troylus and Cresseid is 'n toneelstuk deur William Shakespeare wat uit ongeveer 1602 dateer (kort na die voltooïng van Hamlet). Dit is in twee verksillende weergawes in kwarto formaat uitgegee, beide in 1609. Dit is nie bekend of die toneelstuk ooit in die tyd opgevoer is nie, aangesien die twee uitgawes mekaar teenspreek: die een verkondig op die titelbladsy dat die toneelstuk onlangs op die verhoog opgevoer was, terwyl die ander een in sy voorwoord beweer dat dit 'n nuwe toneelstuk is wat nog nooit opgevoer was nie.
Die toneelstuk word deur baie mense as ongewoon beskou. Die kwarto weergawe bestempel dit as 'n historiese toneelstuk, terwyl die Eerste folio dit saam met die tragedies kategoriseer. Die verwarring word vererger deur die feit dat die toneelstuk se bladsye, in die oorspronklike binding van die Eerste folio, nie genommer is nie en die titel heel duidelik by die inhoudsbladsy ingedruk is. Na aanleiding van hierdie bewyse glo akademici dat die toneelstuk 'n baie laat toevoeging tot die Eerste folio was en dus bygevoeg was waar daar ook al nog spasie was. Die toneelstuk is nie 'n tipiese tragedie nie, aangesien die hoofkarakter nie sterf nie, maar dit eindig nietemin op 'n sombere noot. Die styl van die stuk spring die heeltyd rond tussen vulgêre humor en tragiese droefgeestigheid en dit is somtyds moeilik om te verstaan hoe die gehoor veronderstel is om op die karakters so doen en late te reageer.
